میدانښار (پژواک، ۶ تله ۱۴۰۱): د میدان وردګو د عامې روغتيا ریاست وايي، نن د دغه ولایت په ولایتي روغتون کې د وينې تصفيې (هیموډیالز) څانګه فعال شوه.
د عامې روغتيا وزارت د هیموډیالز پروژې مشر محمدقاسم صاحبي چې د یادې څانګې پرانيستې مراسمو کې د ګډون په موخه دغه ولایت ته تللی و، پژواک ته وویل، د يادې څانګې په پرانيستل کېدو نږدې څلور میلیون افغانۍ لګښت راغلی چې د وزارت له بودجې ورکړل شوی دی.
ده وویل، پخوا په محدودو روغتونونو کې د هیموډیالز مرکزونه فعال وو، خو زیاته يې کړه چې اوس دغه مرکزونه په ډېرو ولایتونو کې فعال شوي دي.
هغه زیاته کړه: «تر اوسه مو د هېواد په ۱۳ نورو ولایتونو کې د وینې صافولو یاد مرکزونه فعال کړي دي.»
د دغه ولایت د عامې روغتیا رییس ډاکتر محمد زرک ځیرک وویل، په دغه مرکز کې به د میدان وردګ سربېره د لوګر، غزني او نورو ګاونډو ولایتونو ناروغانو درملنه هم ترسره کېږي.
هغه زیاته کړه، پخوا په دغه ولایت کې د هیموډیالز مرکز د نه شتون له امله ډېر ناروغان له ستونزو سره مخ وو.
د میدان وردګو د عامې روغتيا ریاست د معلوماتو له مخې، په دغه ولایت کې ټولټال ۱۰۴ روغتیایي مرکزونه فعالیت لري.
Visits: 198
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن