کابل (پژواک، ۹ تله ۱۴۰۱): د افغانستان د ساختماني او لوجستیکي شرکتونو اتحادیو د خپلو هغو پورونو غوښتنه وکړه چې له مودو راهیسې پر سکټوري وزارتونو پاتې دي.
د یادې موضوع په اړه د تلې په ۹مه د ساختماني، لوجستيکي او سړک جوړونې شرکتونو په کابل کې غونډه ترسره کړه.
په یاده غونډه کې د سوداګریزو شرکتونو ټولنې رییس نورالله مبارز وویل چې د دوی حق دې ورکړل شي.
نوموړي ټينګار وکړ، که د دوی پور ورنه کړل شي، په ټولو ولایتونو کې به همداسې غونډې جوړې کړي.
مبارز وویل چې په هېواد کې فقر زیات دی او له حکومته یې غوښتنه وکړه، څو د سوداګرو ملاتړ وکړي.
همدارنګه د افغانستان د سوداګرو او پانکوالو ټولنې رییس بازمحمد غیرت پژواک ته وویل چې د لوجستکي، ساختماني او سړک جوړونې شرکتونو د زرګونو پروژو شاوخوا ۶۰ میلیارد افغانۍ په سکټوري وزارتونو پور پاتې دی.
نوموړی وایي: «موږ د سوداګرۍ له وزارت سره خپله ستونزه شریکه کړې وه، هغوی یو میکانیزم جوړ کړ او موږ ته یې په اقتصادي غونډه کې برخه راکړه او د اقتصادي کمېټې له لوري د ملا برادر په مشرۍ یوه مصوبه تصویب شوه.»
هغه زیاته کړه، د یادو شرکتونو پورونو د ورکړې لپاره مالیې وزارت، سوداګرۍ وزارت، د افغانستان بانک او ټولګټور وزارت ته دنده ورکړل شوه څو دغه ستونزه حل کړي.
د هغه په خبره، د مالیې وزارت هغه مصوبه پر خپل وخت تطبیق نه کړه او د دوی پور تر اوسه پاتې دى.
بل لور ته د ماليې وزارت ویاند احمدولي حقمل پژواک ته وویل چې د قراردادي شرکتونو د طلباتو، تضمیناتو او تامیناتو د ورکړې لپاره یو میکانیزم جوړ شوی دی.
هغه زیاته کړه: «دغه میکانیزم د اقتصادي معاونیت ته استول شوی چې هر کله د اقتصادي معاونیت له لوري تایید شي نو اړوند کمېټه به په عملي توګه خپل کار پیل کړي.»
د یادونې ده، دا لومړی ځل نه دی چې دغه شرکتونه د خپلو پورونو د ورکړې غوښتنه کوي تر دې يې وړاندې يې هم يادو پورونو د ورکړې غوښتنه کړې ده.
غړيYou need to subscribe to view the full article. Please login or register a new account.
