د کابل ښار په کارته پروان کې چاودنه شوې، مرګ‌ژوبله نه لري

<p style="text-align: justify;">لومړی تعقیب - کابل (پژواک، ۱۲ تله ۱۴۰۱): د کابل امنیه قومانداني وایي، د کابل ښار د دویمې امنیتي حوزې اړوند په دهن نل سیمه کې چاودنه شوې، خو مرګ‌ژوبله نه لري.</p>

<p style="text-align: justify;"> د کابل امنیې قوماندانۍ ویاند خالد ځدراڼ پژواک خبري اژانس ته وویل چې نن سهار په یاده سیمه کې «د سړک پر سر څه موادو انفجار کړی، الحمدالله کوم تلفات نه لري.»</p>

<p style="text-align: justify;">د محمدزمان په نوم یوه کس پژواک ته وویل چې چاودنه نن سهار شاوخوا اته بجې، د کارته پروان اړوند په «دهن نل» سیمه کې شوې ده.</p>

<p style="text-align: justify;">هغه وویل: «زه له چاودنې وروسته په سیمه کې تېرېدم، ومې لیدل چې چاودنه د سړک د منځ په ګلدان کې شوې وه، خو نه پوهېږم چې مرګ ژوبله به یې لرله که نه.»</p>

<p style="text-align: justify;">د ټکسي یو موټرچلوونکی چې نه غواړي نوم یې څرګند شي وایي: «زه د کارته پروان په څلورلارې کې وم چې د چاودنې غږ مې واورېد، خو په اړه یې نور معلومات نه لرم.»</p>