کابل (پژواک، ٢٨ تله ۱۴۰۱): په کابل کې یو شمېر موټرپلورونکي وایي، د خلکو خراب اقتصادي وضعیت له امله په هېواد کې د موټرو پلور کم شوی او د پخوا په نسبت یې بيې هم ټيټې شوې دي.
په دې اړه په کابل کې يوه موټرپلورونکي حاجي وفا پژواک خبري اژانس ته وویل، له چا سره چې پیسې وې، هغوی ټول له هېواده وتلي او اوس تر ډېره بېوزله خلک پاتي دي چې د موټر پېرولو توان نه لري.
هغه زیاته کړه چې مخکې به یې په اونۍ کې له پنځو تر لسو پورې موټر پلورل خو اوس په یوه میاشت کې هم په دې شمېر سودا نه کېږي.
دی وایي چې په افغانستان کې د ټولو توکو بیه لوړه شوې خو یواځې د موټرو بیې ټیټې شوې دي.
نوموړی وایي، مخکې به ۹۷ ماډل کرولا په ۷۰۰۰ زره ډالر پلورل کېده خو اوس دغه ډول موټر شاوخوا څلور زره ډالر پلورل کېږي.
د حاجی وفا د معلوماتو له مخې، ۲۰۱۰ ماډل کرولا په تېر نظام کې تر شاوخوا ۸۰۰۰ زره ډالر پلورل کېده، خو اوس دغه ډول موټر تر شپږ زره ډالر پلورل کېږي.
دغه راز، په کابل کې د موټرو بل پلورونکی قاسم هم شکایت کوي چې د خلکو اقتصادي ستونزو له امله په هېواد کې د موټرو پېر او پلور کم شوى دى.
نوموړی وایي چې په تېر نظام کې به یې په اونۍ کې له شپږ تر اتو پورې موټر پلورل خو اوس په دوو مياشتو کې هم دغه شمېر نه شي پلورلی.
هغه دا هم وویل چې په هېواد کې له سیاسي بدلون وروسته او د نوي حکومت په لومړيو ورځو کې د موټرو پلور هېڅ نه و خو اوس بېرته يو څه ښه شوى دى.
دی وایي چې په تېر نظام کې د ۲۰۰۷ ماډل کېمري موټر بیه نږدې ۸۰۰۰ زره ډالر وه خو اوس شاوخوا په ۴۵۰۰ ډالر پلورل کیږي.
قاسم دغه راز وویل: «د لنډکروزر موټرو بازار یو څه بېرته ښه شوى خو بیې ټیټې شوې؛ په تېر نظام کې ۲۰۱۰ ماډل لنډکروزر موټر په ۴۵ زره ډالر موږ پلوره خو اوس شاوخوا ۲۹ زره ډالره پلورل کېږي.»
دغه راز یو بل موټرپلورونکي پروېزالله پژواک ته وویل چې په تېر نظام کې يې په اونۍ کې له درېيو تر څلورو پورې موټر پلورل خو اوس یو څه بازار کمرنګه شوی دی.
نوموړی وایي چې په تېر نظام کې د ۲۰۱۶ ماډل بنس موټر بیه شاوخوا ۴۳ زره ډالر وه خو اوس په ۲۳ زره ډالر پلورل کېږي.
هغه زیاته کړه چې ۲۰۱۳ ماډل کرولا موټر بیه په تېر نظام کې ۱۶ زره ډالر وه خو اوس شاوخوا په ۱۱ زره ډالر پلور کېږي.
يو شمېر نورو موټرپلورونکو هم ورته څرګندونې وکړې او ویل یې چې د خلکو خراب اقتصادي وضعیت له امله د موټرو پلور ډېر کم شوى دى.
پژواک هڅه وکړه چې د يادې ستونزې په اړه د حکومتي مسوولينو نظر هم واخلي خو هغوی د څو ورځو په تېرېدو سره لا هم ځواب نه دى ورکړى.
خو له دې مخکې د سرپرست حکومت مشرانو ویلي چې د بېکارۍ کمولو او کارموندنې په موخه د لنډمهال او منځمهالو طرحو پر جوړولو کار کوي او د سکټوري وزارتونو او اړوندو ادارو له متخصصينو سره په همغږۍ د کارموندنې ملي پاليسي جوړوي.
