اټلانټا (پژواک، ۴ لړم ۱۴۰۱): د افغانستان د پخواني پوځ د ځانګړو عملیاتو قول اردو قوماندان جنرال فرید احمدي وايي، په جګړه کې ښکېل هېوادونه په دې هڅه کې دي څو د افغانستان پخواني کومانډویان د جګړې لپاره جذب کړي، یادو کومانډویانو ته یې خبرداری ورکړی چې ځانونه په دغه خطرناک دام کې وانه چوي.
افغان کومانډویان چې د د امریکا او ناټو ځواکونو له خوا روزل شوي وو، د سیمې په کچه یو مجرب ځواک و او تېر کال یې د کابل له سقوطه مخکې په افغانستان کې پېچلي پوځي عملیات پر مخ وړل.
د افغانستان د تېر حکومت د ځانګړو عملیاتو قول اردو قوماندان جنرال محمدفرید احمدي له امریکا غږ سره په یوه ځانګړې مرکه کې ویلي چې د نړۍ په شپږو”مهمو سیمو” – ناګورنو قره باغ، اوکراین، یمن، ایران، سوریه او روسیه کي د پخوانیو افغان کومانډویانو کوچنۍ ډلې عملي حضور لري.
هغه زیاته کړې چې د اوکراین، سوریې او یمن په څېر جګړو کې ښکېلو خواوو له افغان کومانډویانو په خپلو لیکو کې د ورګډېدو غوښتنه کړې ده.
دغه پخواني پوځي افسر ویلي چې د جمهوریت له سقوط مخکې لږ تر لږه ۳۰ زره سرتېرو د افغانستان د ځانګړو ځواکونو په لیکو کې خدمت کاوه.
جنرال احمدي ویلي چې د جمهوریت له سقوط وروسته د کومانډویانو په ګډون د افغانستان د امنیتي ځواک یو شمېر سرتېري بهر وتلي او یا یې ګاونډیو هېوادونو ته تېښته کړې ده.
دا په داسې حال کې ده چې د روسیې ولسمشر ولاديمیر پوتین د اوکراین په جګړه کې د سرتېرو له کموالي سره مخ دی، د فارن پالیسي خپرونې د راپور له مخې، د واګنر په نوم له روسي ډلې چې اجیر سرتېري جلب او جذبوي، غوښتي څو بندیان جګړې ته ولېږي. واګنر ډله د روسیې د نظامي استخباراتو له خوا تمویلېږي.
فارن پالیسي د یوه پخواني افغان کومانډو له قوله ویلي، د ده په باور واګنر ډله د افغانستان د پخواني اردو د ځانګړو ځواکونو په جلب او جذب کې لاس لري. دغه افغان کومانډو ویلي: «یوازېنۍ ډله چې د روسیې لپاره بهرني کسان د سرتېرو په ډول جذبوي، واګنر ده، نه د روسیې اردو، دا ګومان او حدس نه بلکې یو واقعیت دی.»
د امریکا د استازو مجلس د بهرنیو اړیکو کمیټې رییس مایکل مک کال تېر کال خبرداری ورکړ چې د افغانستان د مخکني حکومت ځانګړي ځواکونه له متحده ایالتونو سره د متخاصمو هېوادونو له خوا د سربازګیرۍ په حالت کې دي او متحده ایالتونو ته ګواښ جوړوي.
احمدي د دې پخواني سرتېرو د بې برخلیکۍ په اړه وویل: «متحده ایالتونو د پخواني افغان ځواکونو د یوه شریک او متحد په توګه له افغان کومانډویانو سره وعده خلافي وکړه.»
د هغه په خبره، افغان کومانډویان د دې حق لري چې متحده ایالات د نړۍ د یوه ځواکمن هېواد په توګه پر خپله ژمنه وفا وکړي او دغه سرتېري د نورو له خوا سربازګیرۍ ته له نیولو راوګرځوي.
څو میاشتې مخکې په کوزوو کې د امریکا سفیر فیلیپ کازنت پر اوکراین د روسیې له برید وروسته وړاندیز کړی و چې د متحده ایالتونو د اردو ترکیب کې دې د مخکنیو افغان نظامیانو یوه قطعه ایجاد شي.
احمدي وايي، وروسته له هغه چې افغان کومانډویان بهرنینو هېوادونو ته د جګړو سیمو ته لېږل کېږي، ټیلېفونونه ترې اخیستل کېږي، څه وخت وروسته ورته نوې شمېره او ټيلېفون ورکول کېږي څو له هغه په استفادې خپل نور ملګري ور وغواړي.
غړي
You need to subscribe to view the full article. Please login or register a new account.
