[restrict paid="true"]
<p style="text-align: justify;">اټلانټا (پژواک، ۲۲ لړم ۱۴۰۱): امریکا د افغانستان سرپرست حکومت له خوا پارکونو ته د ښځو پر تلو د بندیز په غبرګون کې ویلي چې دا ډول محدودیتونه د بېثباتۍ، بېوزلۍ او له افغانستانه د خلکو د فرار لامل کېدای شي.</p>
<p style="text-align: justify;">د افغانستان سرپرست حکومت د امربالمعروف او نهي عنالمنکر وزارت په دې وروستیو کې پارکونو او ورزشي کلبونو ته د ښځو پر تلو بندیز لګولی دی.</p>
<p style="text-align: justify;">د افغانستان د ښځو، نجونو او بشري حقونو په برخو کې د امریکا ځانګړې استازې مېرمن رینا امیري په یوه ټویټ کې ویلي، هغه کسان چې له «افراطيته» وېره لري، باید د ښځو او نجونو پر وړاندې د افغانستان د اوسنیو واکمنانو له تګلارو اندېښمن و اوسي.</p>
https://twitter.com/SE_AfghanWGH/status/1591498513237831680?s=20&t=Y6yhDcGOlmlwXKWbfiJBmA
<p style="text-align: justify;">هغې زیاته کړې: «د اوسنیو مسوولینو د تګلارې له مخې، زدهکړو، ډېرو سکټورونو کې کار کولو، حتی کوچنۍ خوښیو لکه پارک ته باید ښځې ولاړې نه شي چې دا افراطیت د بېثباتۍ، بېوزلۍ او د نفوس د فرار لامل کېږي.»</p>
<p style="text-align: justify;">بلخوا د افغانستان لپاره د امریکا سفارت شارژدافیرې مېرمن کرن ډیکر هم پر ټویټر لیکلې، پرون له اسلاماباده د روانېدو پر مهال خبره شوه چې په افغانستان کې ښځې پارکونو ته له تلو منع شوې دي.</p>
<p style="text-align: justify;">هغې زیاته کړې، دا خبره که رښتیا وي نو هیڅ جواز نه لري.</p>
https://twitter.com/USAmbKabul/status/1591399940663971843?s=20&t=UhQQ4fEllimRVaWJdb_8MA
<p style="text-align: justify;">مېرمن ډیکر پر ټویټر لیکلي: «ښځې هم د سړیو په څېر پارکونو ته د تلو حق لري؛ دوی د خپلو ماشومانو پالنه کوي چې تازه هوا او له کوره وتلو ته اړتیا لري، دا د ښځو، ماشومانو او افغانستان لپاره بده پرېکړه ده.»</p>
<p style="text-align: justify;">دغه راز د بشري حقونو د څار نړۍوال سازمان هم پارکونو ته د ښځو پر تلو بندیز غبرګون ښودلی او ویلي یې دي، دا په افغانستان کې د ښځو پر حقونو یو بل ګوزار دی.</p>
<p style="text-align: justify;">دغه سازمان په یوه ټویټ کې لیکلي، مسوولین باید دا پرېکړه ژر تر ژره بیرته واخلي.</p>
https://twitter.com/amnestysasia/status/1591043329508405249?s=20&t=PtrSiJto7iBvX2WOxBCXWw
<p style="text-align: justify;">سرچینې پر نړۍوالې ټولنې غږ کړی چې د سرپرست حکومت له خوا د ښځو او نورو د حقونو پر منظمو مصیبتونو سترګې پټې نه کړي.</p>
<p style="text-align: justify;">د امر بالمعروف او نهی عنالمنکر وزارت درې ورځې مخکې ویلي وو چې له دې وروسته ښځې پارکونو، ورزشي کلبونو او سینګار ځایونو ته شي تللی.</p>
<p style="text-align: justify;">د دغه وزارت ویاند عاکف مهاجر وایي، دوی په تېرو پنځلسو میاشتو کې تر خپل وسه هڅه وکړه چې ښځې له پارکونو منع نه کړي خو وایي، هغوی ټاکلي اصول عملي نه کړل.</p>
<p style="text-align: justify;">هغه زیاته کړې: «اسلامي امارت هڅه وکړه چې تفریح ځایونو ته د خویندو د تلو اجازه وشي او هغوی په اسانه هلته لاړې شي خو نه پارکونو والا سمه همکاري کوله او نه خویندو په سمه توګه حجاب مراعات کاوه، د اوس لپاره همداسې [د بندیز] امر شوی.»</p>
[/restrict]
