پولنډ وایي، د روسیې په توغندیز برید کې یې دوه وګړي وژل شوي

[restrict paid="true"]

اټلانټا (پژواک، ۲۴ لړم ۱۴۰۱): پولنډ وایي، روسیې پرې دوه توغندي توغولي چې له امله یې دوه کسان وژل شوي؛ روسیې بیا دا ادعا رد کړې، خو امریکا او ناټو وایي چې پلټنې یې پیل کړې دي.

سي‌ان‌ان د پولنډ د بهرنیو چارو وزارت په حواله خبر ورکړی چې د نومبر په ۱۵مه، ناوخته دوه د روسیې جوړ توغندي له اوکراین سره پر سرحدي سیمې لګېدلي دي.

سرچینې زیاته کړې چې دغه توغندي په ځایي وخت مازیګر شاوخوا څلور بجې پر یوه سرحدي کلي لګېدلي او له امله یې دوه کسان وژل شوي دي.

خو د پولنډ د بهرنیو چارو وزارت دا نه دي ویلي چې دا څه ډول توغندي وو او له کوم ځای څخه توغول شوي دي.

په خبرپاڼه کې راغلي، د دې پېښې په غبرګون کې یې په وارسا کې د روسیې سفیر احضار کړی، څو سپیناوی وکړی چې ولې د روسیې جوړ توغندي یې پر خاورې لګېدلي دي.

دا په  داسې حال کې ده چې روسیې نن د اوکراین پر پلازمېنې شاوخوا ۱۰۰ توغندي توغولي او د برېښنا د تولید ۱۵ مرکزونه یې په نښه کړي دي.

بلخوا، د روسیې دفاع وزارت دا ادعا رد کړې او ویلي چې پولنډ او متحدین یې غواړي د سیمې حالات نور هم خراب کړي.

خو په مسکو کې د کریملن ویاند ویلي چې دوی په پولنډ کې له کومې پېښې نه دي خبر.

په همدې حال کې، د پولنډ ولسمشر ډوډا د ناټو له سرمنشي او د امریکا له ولسمشر سره ټېلیفوني خبرې کړې دي. د امریکا د ملي امنیت سلاکار هم له خپل پولنډي سیال سره لیدلي دي.

دغه‌راز د ناټو سازمان بېړنۍ غونډه هم رابلل شوې ده؛ د دې ترڅنګ د پولنډ د ملي امنیت فوق‌العاده بېړنۍ غونډه رابللې ده، څو د راتلونکو اقداماتو په اړه پرېکړه وکړي.

بلخوا، سپینې ماڼۍ او پنټاګان ویلي چې دوی پر پولنډ د روسیې توغندویي بریدونو په اړه د خپرو شوو راپورونو پلټنې کوي، خو دغه برید یې نه دی تایید کړی.

[/restrict]