د روغتیا نړۍوال سازمان را روان ژمي لپاره سلګونه روغتیايي مرکزونو ته طبي توکي چمتو کړي

کابل (پژواک، ۱ لیندۍ ۱۴۰۱): په افغانستان کې د روغتیا نړۍوال سازمان وایي، په راتلونکي ژمي کې يې د روغتیایي اسانتیاوو په موخه، ۹۱ ولسوالیو کې ۳۰۱ روغتیایي مرکزونو ته طبي توکي چمتو کړي دي.

دغه سازمان نن (د لېندۍ په لومړۍ) په خپله ټویټرپاڼه کې لیکلي چې ۳۰۱ روغتیایي مرکزونو ته ۶۹۳ میټریک ټنه ایمرجنسي کیټونه او طبي توکي برابر کړي دي.

د یاد سازمان د معلوماتو له مخې، یاد شمېر روغتیايي مرکزونه په هغو ولسوالیو کې دي چې د ژمي په موسم کې يې د واورو او یخنۍ له امله د ولایتونو له مرکزونو سره لارې بندېږي.

د یادونې ده چې د لړم په ۲۶مه هم اروپايي ټولنې له افغانستان سره د ۳۶ ټنه درملو او طبي توکو مرسته کړې وه.