غزني ښار (پژواک، ۷ لېندۍ ۱۴۰۱): د غزني ولایت د مرکز اړوند پنځمې امنیتي حوزې مربوطاتو کې د ډبرو سکرو بخارۍ ګاز له امله یوه مور او د هغې دوه ماشومان مړه شوي دي.
د دغه ولایت د امنیې قومندانۍ ویاند ابوخالد سرحدي د لېندۍ په اوومه پژواک خبري اژانس ته وویل چې تېره شپه ناوخته د غزني ښار پنځمې امنیتي حوزې اړوند د قدم کلا اړوند د عمري پله ساحه کې د ډبرو سکرو بخارۍ ګاز له امله درېیو کسانو چې یو مور او دوه ماشومان یې دي، خپل ژوند له لاسه ورکړی دی.
نوموړي زیاته کړه، په دې پېښه کې د مور ترڅنګ د هغې دوه لوڼې چې یوه درې کلنه او بله پنځه کلنه ده، هم مړې شوې دي.
د يادونې ده، شاوخوا دوه اونۍ مخکې هم د غزني په واغظ ولسوالۍ کې د ورته پېښې له امله يوه ۱۸ کلنه پېغله مړه شوې وه.
