اټلانټا (پژواک، ۷ لېندۍ ۱۴۰۱): په نوي ډیلي کې د افغانستان لوی سفارت وایي چې د هند په نړۍوال سوداګریز نندارتون کې افغان محصولاتو د ۱۷ هېوادونو په منځ کې د سرو زرو مډال خپل کړی دی.
د یاد سفارت له خوا د لېندۍ په ۷مه په خپره شوې یوه خبرپاڼه کې راغلي چې د سوداګریزې ودې ادارې له خوا جوړ شوی دا کلنی سوداګریز نندارتون چې د هند د بېلابېلو ایالتونو او د نړۍ ۱۷ هېوادونو تولیدات او محصولات پهکې نندارې، سوداګریزو معاملاتو او خرڅلاو ته وړاندې شوي وو، پرون پای ته ورسېد.
سرچینې زیاته کړې، دغه ستر سوداګریز نندارتون سږ کال د کوچني هند په نوم هم ونومول شو؛ ځکه چې د کرونا له محدودیتونو وروسته په لومړي ځل د هند په میلیونونو خلک له دغه ستر نندارتونه لیدنه وکړه.
په خبرپاڼه کې راغلي، سږ کال دغه نندارتون په شاوخوا یونیم لکه میتر مربع ساحه کې تنظیم شوی و چې د نړۍ په کچه یو له سترو نندارتونونو و.
سرچینې زیاته کړې، په هند کې د افغانستان لوی سفارت په هڅو سره سږ کال هم په دغه نندارتون کې نندارې ته د افغاني تولیداتو او محصولاتو نندارې اېښودو زمینه برابره شوې وه. سږ کال افغانستان د وچې مېوې بېلابېل ډولونه، غالۍ، زعفران، شات، له مرمر تیږو جوړ شوي تولیدات، لاسي جوړ شوي توکي او افغاني خواږه په شاوخوا ۲۲ لویو او کوچنیو غرفو کې نندارې ته وړاندې شول.
سفارت ویلي، د یاد نندارتون په وروستۍ ورځ د ارزونې کمیټې چې د هند د پوهنتون استادان، سوداګر، د رسنیو استازي او نور پکې شامل وو خپل راپور وړاندې کړ.
د سرچینې د معلوماتو له مخې، دوی د نندارتون د ۱۵ ورځو په جریان کې د افغانستان تولیدات سوچه او د ډېرې توجه وړ ارزولي وو او په دې توګه یې په نړۍواله ګتګورۍ کې لومړی مقام خپل کړ؛ یعنې د سروزرو اېوارډ ورکړل شو.
د کمېټې د معیارونو له مخې، باکیفیته او سوچه تولید، د هټۍوالو چلند، د نندارچیانو د پاملرنې جذب، ښه خرڅلاو او سوداګریزې معاملې او بالاخره د غرفو ښه ډیزاین او د نظم مراعاتول هغه څه وو چې د افغانستان حضور یې لومړي مقام ته پورته کړ.
په هند کې د افغانستان لوی سفیر فرید ماموندزي د هند له حکومت، خلکو او سوداګریزې ټولنې مننه وکړه چې افغاني تولیداتو ته یې د نندارې او د هند لوی مارکېټ ته د رسېدو زمینه برابره کړې ده.
نوموړي ټینګار وکړ چې د هند له کرنیزو او تولیدي امکاناتو په ګټه اخیستو سره به د افغاني تولیداتو لپاره د هند له لارې د نړۍ مارکېټونو ته د وصل زمینه برابره کړي.
د یادنې ده، سږ کال د نندارتون پر مهال د بېلابېلو افغاني تولیداتو او محصولاتو د خرڅلاو ترڅنګ د وچې مېوې، زعفران او غالیو صادراتو په برخه کې افغان سوداګرو ته د سوداګریزو معاملاتو زمینه هم برابره شوه.
په هند کې د افغانستان لوی سفیر د سفارت اړوند برخې ته لارښوونه وکړه چې د نندارتون له تجربو په استفاده هند کې نور دې ډول فرصتونو ته توجه وکړي او د افغاني تولیداتو لپاره د مارکېټ په پیدا کولو کې خپل مسوولیت ادا کړي.
غړيYou need to subscribe to view the full article. Please login or register a new account.
