جلالاباد (پژواک، ۱۱ لېندۍ ۱۴۰۱): د ننګرهار د پوهنې ریاست وايي، د پوهنې وزارت له لارښوونې سره سم به د دغه ولايت د سړو سيمو د دولسمو ټولګيو له ښځينه زدهکوونکو څخه کلنۍ ازموینه واخېستل شي.
د یاد رياست د معلوماتو له مخې، د پوهنې وزارت د یوه رسمي مکتوب له مخې د ننګرهار ولايت د سړو سيمو په ښوونځيو کې ياده چاره ترسره کېږي.
د ننګرهار د پوهنې رياست وياند فرهاد احمد ستانکزي د لېندۍ په ۱۱مه پژواک اژانس ته وويل، د دغو زدهکوونکو د ارتقا په موخه له ټولو مضمونونو څخه ۱۴۰ پوښتنې چمتو شوې دي او ازموینه به په درېيو ساعتونو کې واخیستل شي.
هغه زياته کړه: «په دې کې یوازې هغه نجونې او خویندې برخه اخیستلای شي چې څوک په دولسم ټولګي کې موجود وي او د هغوی نوم په حاضرۍ کتاب کې لیکل شوی وي. هغه خویندې چې تېر کال محرومې یا ناکامې شوې وي او د نورو ستونزو له کبله ټولګي ته نه وي حاضرې شوې، نه شي کولای ګډون وکړي.»
هغه وايي چې د وزارت له دغه مکتوب سره سم د سړو ولايتونو د دولسم ټولګي له ښځينه زدهکوونکو څخه ازموينه اخيستل کېږي.
پژواک هڅه وکړه چې په دې تړاو د پوهنې وزارت نظر هم واخلي، خو د وزارت مطبوعاتي مسوولينو تر اوسه په دې اړه د پژواک اړيکه نه ده ځواب کړې.
د يادونې ده چې د ننګرهار په حصارک، شېرزاد، هسکه مېنه او درهنور ولسواليو کې ګڼ ښوونځي د سړو سيمو له ښوونيز کال سره مخته ځي.
واک ته د اسلامي امارت له رسېدو سره سم تر شپږم ټولګي پورته د نجونو ښوونځي تړل شوي دي. وزارت وايي چې په دې اړه پر يوې طرحې کار روان دى.
