غزني ښار (پژواک، ۱۲ ليندۍ ۱۴۰۱): د کابل - کندهار عمومي لویه لار چې د غزني په مربوطاتو کې زیاته خرابه شوې او بيارغونې ته جدي اړتيا لري، نن یې د قیراچونې چارې عملاً پیل شوې.
د غزني د ټولګټو چارو ریاست مسوولین وايي، د یاد سړک د هوارکارۍ او پولګوټو جوړولو کارونه شاوخوا دوه میاشتې مخکې پيل شوي وو، چې نن یې د قیراچونې چارې هم عملاً پیل شوې او تر واورو ورېدو پورې به دوام ولري .
د غزني د ټولګټو چارو ریاست سرپرست ملا محب الله عباس پژواک خبري اژانس وویل، د غزني له ښاره بیا د مقر ولسوالۍ تر بازاره چې انجنيرانو سروې کړی، ۱۱۰ کیلومتره سړک چې د سړک سور ۷ متره او پلنوالی يې شل سانتي دی، په پاخه او اساسي شکل جوړېږی او بودجه یې هم د ټولګټو چارو وزارت له لوري ورکوي کېږي.
د ده په وینا، دغه سړک هېچا ته په قرارداد نه دی ورکړل شوی، بلکې د رغولو چارې یې خپله د ټولګټو چارو وزارت په مالي لګښت ترسره کېږي، دغه راز د همدې وزارت په ماشینونو او پرسونل يې چارې پر مخ وړل کېږي .
هغه زیاته کړه، وخت او لګښت يې دوی ته معلوم نه دی چې څومره لګښت پرې راځي او په څومره وخت کې به ورغول شي، خو زیاتوي، د لګښت او وخت په اړه یې یوازې د ټولګتو چارو وزارت معلومات لري.
د کابل- کندهار لویه لار نږدې ۵۰۰ کیلومتره سړک ده، چې د تېرو شلو کلونو جګړو، ماین چاودنو، د چاکونو او د قیر ښکته تللو له کبله ډېر ویجاړ شوی، چې مسافر یې تل په اړه شکایتونه کوي.
په یاده لار تلونکي موټر چلوونکي وايي، د تخريب شوي سړک او پلونو له امله يې نه یوازې تګ او راتګ ځنډنی کېږي، بلکې موټر یې تخنيکي ستونزې هم پيدا کوي.
خو اوس د دغه سړک اساسي جوړولو له امله موټر چلوونکي خوښي څرګندوي، وايي چې د یاد سړک په جوړولو سره به یې پر مخ پرتې ستونزې حل شي.
له دې ډلې یوه موټر چلوونکي حاجي نواب پژواک اژانس ته وويل، د دې لويې لارې بيارغونه او پراختيا به د مسافرینو او سوداګريزو کاروانونو په تګ راتګ کې اسانتياوې رامنځته کړي.
نوموړي وویل: «له کندهار- کابله په سلګونو پلچکونه خراب شوي دي، اوس کابل ته په شپو شپو کې رسېږو، خو که دا سړک جوړ شي، نو په لس ساعتونو کې رسېدلی شو.»
هغه زیاته کړه، یوازې دا ستونزه نه ده، بلکې د دوی د موټرو ټايرونه خرابېږي، موټر يې نورې ستونزې او عوارض پیدا کوي، نو هیله لري چې په دې برخه کې کوټلي ګامونه واخیستل شي او ژر جوړ شي.
د دې لارې بل موټر چلوونکي ذکي پژواک ته وویل، خوښ دي چې د دې سړک کارونه شروع شوي، په دې کار سره به د موټرو د تګ راتګ پرمهال د ترافيکي پېښو د مرګ ژوبلې کچه هم راټيټه شي.
نوموړي له خلکو وغوښتل چې د سړک تر جوړولو وروسته دې په ساتنه کې یې له مسوولينو سره همکاري وکړي.
یاده دې وي چې د کابل – کندهار لويه لار چې د هېواد له مشهورو ترانزیتي او مهمو لارو څخه ده، د هېواد څو ولایتونه سره نښلوي؛ دغه لويه لار ۴۸۳ کیلومتره اوږدوالی لري، شاوخوا ۲۰۰ کیلومتره سړک د غزني په اړوندو سیمو کې تېره شوی، چې پلازمېنه کابل له څو سویلي او لوېدیځو ولایتونو سره نښلوي .
د کابل – کندهار سړک د افغانستان له لویو لارو څخه ده، چې په دې لویه لاره د ورځې په زرګونو مسافرین او تر لس زره زیات سوداګریز او مسافر وړونکي موټر تګ را تګ کوي.
غړيYou need to subscribe to view the full article. Please login or register a new account.
