کندهار (پژواک، ۱۲ لېندۍ ۱۴۰۱): کندهار کې د ښاروالۍ له خوا د ښاري نظم او د سړکونو له غاړو د لاسي کراچیو لري کولو په موخه د غرفو ايښودو لړۍ پيل کړه.
د دغو غرفو وېش د کندهار ښار څلورمې ناحیې اړوند د جمهوریت له څلورلارې پيل شوی او په لومړي ګام کې شل غرفې کېښودل شوې چې مستحقو کسانو ته به د میاشتې په ۵۰۰ افغانۍ کرایه ورکول کېږي.
په دې اړه نیول شوو مراسمو کې د کندهار ښاروالۍ مرستیال مفتي قدرتالله الوصال وویل، پلان لري چې د دغو غرفو شمېر ۴۰۰ ته ورسوي او د ښار په هغو مهمو برخو کې یې کېږدي چې بېنظمي او ګڼهګوڼه وي.
هغه زیاته کړه: «موږ دا کار له خصوصي سکټور سره په ګډه کوو څو په ښار کې نظم مراعات شي او په عین حال کې هېوادوالو ته د کار زمینه هم برابره شي، نو دا لړۍ به موږ نوره هم وغځوو.»
هغه کسان چې دغه غرفې په کرایه ورکول کېږي او پخوا یې هم د دغه غرفو پر ځای مېوې او نور توکي پلورل، خوښ دي چې دا ډول غرفې ورته جوړېږي.
خو دوی وايي چې دا غرفې ډېرې کوچنۍ دي نو ښاروالي باید دوی ته د غرفې اړوند د پخوا په اندازه ځمکه ځانګړې کړي.
د مېوې یو پلورونکی ګلمحمد په دې اړه وایي: «دا غرفې بېخي کوچنۍ دي، په دې کې به موږ چیشی کښېږدو، زموږ غوښتنه دا ده چې موږ ته که درې درې نه وي، دوې دوې دوې غرفې خو دې راکي.»
خو د کندهار ځیني نور اوسېدونکي بیا د ښاري نظم او پاکوالي لپاره دا ښه ګام بولي چې ځانکړې غرفې جوړیږي او ټولو کسانو په یوه اندازه ځای ټاکل کېږي.
د کندهار یو اوسېدونکی محب الله وایي، په دې سیمه کې چې اوس غرفې اېښودل شوې، مخکې ځینو کسانو لس یا پنځلس متره ساحه نیولې وه خو اوس په دې ځای کې نورو کسانو ته هم ونډه ورکول شوې څو هغوی هم دلته توکي وپلوري.
ده زیاته کړه: «دا خو ډېر ښه کار شوی دی، اول زه یم بېروزګاره یم، که مې چېرې په وسه وي، دلته به یوه غرفه کرایه کړم، تر مخه خو هر سړي پر خپل سر ځایونه جوړ کړي وو، لس پنځلس متره ساحه به یې نیولې وه.»
د کندهار اوسېدونکي د ښار په نورو برخو کې هم د لاسي کراچیو او سړک غاړي له پلورونکو شکایتونه کوي او وایي، ښاروالي په دې کار کې پاتي راغلې چې لاسي کراچۍ منظمې کړي.
د کندهار یو رېکشا چلوونکی عبدالغفار لودین وایي، تر ټولو ډېر د ښار په مشهورو ځایونو، لکه هرات بازار، شاه بازار، کابل بازار او ښکاپر بازار کې لاسي کراچیو یا ګاډیو بېنظمي جوړه کړې او سړکونه یې بند کړي دي.
دی له ښاروالۍ غوښتنه کوي چې باید د سړکونو له غاړو ټولې لاسي کراچۍ لرې کړي؛ یوازې هغه دې پرېږدي چې نظم نه خرابوي.
ده وویل: «د ښار نظم دومره خراب شوی چې ما هیڅکله نه دی لیدلی؛ زه خپله رېکشا یو ځای نه شم درولای؛ ځکه سړک ټوله بندوي، نو ښاروالي باید په دې اړه جدي اقدام وکړي.»
کندهار کې دا مهال د مشهورو بازارونو ترڅنګ په ډېرو نورو واټونو کې هم ګڼهګوڼه زیاته شوې، اکثره کسان یو طرفه جادې هم نه مراعاتوي چې ښاري نظم یې ګډوډ کړی او ورسره ترافیکي پېښې هم زیاتې شوې دي.
غړيYou need to subscribe to view the full article. Please login or register a new account.
