<p style="text-align: justify;">اټلانټا (پژواک، ۱۸ لېندۍ ۱۴۰۱): د حزب اسلامي مشر ګلبدین حکمتیار ویلي چې د تېرې جمعې ورځ یې پر جومات دواړه بریدګر د تاجکستان اوسېدونکي وو.</p>
<p style="text-align: justify;">د تېرې جمعې په ورځ د کابل ښار د دارالامان پر سړک د حزب اسلامي د مرکزي دفتر پر ایمان جومات په داسې حال کې چې د حزب اسلامي مشر ګلبدین حکمتیار د جمعې لمانځه خطبه ویله، دوو بریدګرو برید وکړ چې د حزب اسلامي دفتر د ساتونکو له خوا ووژل شول.</p>
<p style="text-align: justify;">بریدګرو له چاودېدونکو توکو خپل ډک موټر ته چاودنه ورکړه او بیا د جومات لور روان وو چې له ساتونکو سره له یوې لنډې نښتې وروسته ووژل شول.</p>
<p style="text-align: justify;">هغه مهال مسوولینو ویلي وو چې په دې پېښه کې د حکمتیار یو ساتونکی وژل شوی او یو بل ټپي دی او دواړه بریدګر هم وژل شوي دي.</p>
<p style="text-align: justify;">حکمتیار د لېندۍ په ۱۸مه د جمعې لمانځه په خطبه کې ناستو کسانو ته د یاد برید په اړه نور معلومات او جزئیات وړاندې کړل.</p>
<p style="text-align: justify;">نوموړي وویل، دواړه بریدګر د لمونځکوونکو په بڼه راغلي وو، چاودېدونکي توکي یې د خپل موټر په سویچبورډ کې ځای پر ځای کړي وو او موټر یې د مراجعینو موټرو پارکینګ کې درولی و.</p>
<p style="text-align: justify;">د حزب اسلامي مشر وایي، کله چې له موټره ښکته کېږي، د جومات لور ته په منډه ورغلل او ډزې یې پيل کړې او سمدلاسه یې موټر ته هم چاودنه ورکړه.</p>
<p style="text-align: justify;">د هغه په وینا، د جومات یوه ساتونکي د جومات دروازه وتړله او له هغوی سره په نښته کې ښکېل شو.</p>
<p style="text-align: justify;">حکمتیار وايي، په لومړیو ډزو کې یو ساتونکی ووژل شو او دوه نور ټپیان شول.</p>
<p style="text-align: justify;">ده زیاته کړې: «دوی په خپل موټر کې ۱۲ کیلوګرامه چاودېدونکي ځای پر ځای کړي وو.»</p>
<p style="text-align: justify;">د نوموړي په خبره چې له بریدګرو ټيلېفونونه او نور اسناد ترلاسه شوي چې د پلټنو پر مهال به ترې استفاده کېږي.</p>
<p style="text-align: justify;">نوموړي ویلي، لومړنیو پلټنو کې معلومه شوې چې راغلي ترهګر د تاجکستان اوسېدونکي وو، افغانان نه وو، ترهګرې ډلې ونه شو کولی چې افغانان دغه برید ته چمتو کړي.</p>
<p style="text-align: justify;">د هغه په وینا، د داعش ډلې تور بیرغ هم له بریدګرو ترلاسه شوی، خو دې ډلې تر اوسه په رسمي توګه نه د دغه برید مسوولیت اخیستی او نه یې هم رد کړی دی.</p>
<p style="text-align: justify;">حکمتیار ویلي چې دوی دمګړۍ کومه ډله نه تورنوي، خو له بشپړو پلټنو وروسته به معلومه شي.</p>
<p style="text-align: justify;">ده زیاته کړه: «کله چې اصلي تورن کسان معلوم شول، خپل حساب به ورسره تصفیه کړو.»</p>
