اسعداباد (پژواک، ۲۸ لېندۍ ۱۴۰۱): د کونړ د ماڼوګي ولسوالۍ اړوند د ننګلام تنګي اوسېدونکو په خپل شخصي لګښت د یوه پله د جوړولو چارې پیل کړې.
د یادې سیمې خلکو د دغه ۱۲ مترو په اوږدوالي کانکریټي پُل جوړولو کار پرون پیل کړ.
د ننګلام تنګي سیمې خلک وايي، دوی د حکومتونو د نه پاملرنې له امله اړ شول چې ځان ته په خپله د یوه پله جوړولو لپاره اقدام وکړي.
د ننګلام تنګي قومي مشر عنایتالرحمن پژواک اژانس ته وویل، د دوی دوه لوی کلي چې سلګونه کورنۍ پکې ژوند کوي، یو بل ته د تګ راتګ لار نه لرله، له همدې امله یې د دغه پله پر جوړولو یې اقدام وکړ.
هغه وویل: «زموږ په سیمه کې تر ۸۰۰ ډېرې کورنۍ ژوند کوي چې د پُل نشتوالي ډېر کړول او یو د بل په غم ښادۍ مراسمو کې يې ګډون نشو کولای، اوس مو د کلیوالو په شخصي لګښت د پله جوړېدو چارې پيل کړې او هیله ده چې په جوړېدو سره يې ستونزې هم حل شي.»
نوموړي زیاته کړه، د پله نشتوالي له امله د سیمې ماشومان ښوونځيو ته پر ډېرو خطرناکو او سختو لارو ځي او والدین يې سخت اندېښمن کړي دي.
د یادې سیمې یوه اوسېدونکي محبالله وویل، حکومتونو د دوی ستونزو ته پاملرنه نه ده کړې او اوس خلک اړ شول چې په خپله اقدام وکړي.
هغه وویل: «زموږ په سیمه کې زرګونه خلک ژوند کوي، د جمهوریت پرمهال مو د ټولو ادارو دروازې وټکولې، د نوي حکومت له چارواکو مو هم غوښتنه وکړه خو څوک مو غږ نه اوري، اوس په خپله مجبور شو چې له کلیوالو پيسې راټولې کړو او د پله جوړېدو کارونه مو پیل کړل.»
نوموړي وویل، اټکل کېږي چې د یاد پله د جوړېدو لګښت به درې میلیون افغانیو ته ورسېږي.
د کونړ ولایت مسوولین هم مني چې د ماڼوګي ولسوالۍ د ننګلام تنګي اوسېدونکي د پله نشتوالي له امله له ګڼو ستونزو سره مخ دي، خو وايي چې د دغې سیمې له خلکو سره به د پله په جوړېدو کې مرسته وکړي.
د کونړ د اطلاعاتو او فرهنګ رییس مولوي نجیبالله پژواک ته وویل: «موږ د ماڼوګۍ ولسوالۍ د تنګي سیمې اوسېدونکو هڅې ستایو چې په خپل شخصي لګښت یې د پله جوړېدو چارې پېل کړې دي؛ زموږ هڅه ده چې له مرکزي حکومت سره په همغږۍ د خلکو ستونزو او اړتیاوو ته په کتو رغنیزې چارې ترسره کړو.»
نوموړي زیاته کړه، حکومت پلان لري چې په کونړ کې د ویجاړو شوو پلونو د بیارغونې ترڅنګ نوي پلونه او سړکونه هم جوړ کړي.
غړيYou need to subscribe to view the full article. Please login or register a new account.
