<p style="text-align: justify;">پلخمري (پژواک، ۳۰ لېندۍ ۱۴۰۱): د بغلان امنیتي مسوولین وايي، د سالنګ لویه لار- چې د تونل دننه اورلګېدنې له امله تړل شوې وه - څو شېبې مخکې د بېړنیو ناروغانو او جنازو لېږدوونکو کوچنیو موټرو پر مخ خلاصه شوه.</p>
<p style="text-align: justify;">د یاد ولایت د امنیې قوماندانۍ ویاند مولوي شېراحمد برهاني پژواک اژانس ته وویل، د سالنګ لویې لارې د څار او ساتنې ادارې مسوول له خوا د ورکړل شوي خبر له مخې، سالنګ تونل د کوچنیو مسافر وړونکو موټرو پر مخ پرانیستل شو.</p>
<p style="text-align: justify;">دغهراز، د بغلان د ترافیکو مدیر قاري نذیرالله عابدي هم پژواک ته وویل چې سالنګ لویه لار د کوچنیو مسافروړونکو موټرو پر مخ خلاصه شوې ده.</p>
<p style="text-align: justify;">هغه زیاته کړه: «اوسمهال د بېړنیو ناروغانو او جنازو موټرو ته له تونل څخه د تېرېدو اجازه ورکول کېږي، خو وروسته به ټولو کوچنیو مسافروړونکو موټرو ته د تګ اجازه ورکړل شي.»</p>
<p style="text-align: justify;">بلخوا، د ټولګټو وزارت ویاند مولوي حمیدالله مصباح هم د یوه ویډیويي پیغام په خپرولو خبر ورکړی چې د سالنګ لار د کوچنیو مسافروړونکو موټرو لپاره پرانیستل شوې ده.</p>
<p style="text-align: justify;">هغه وايي: «د سالنګ تونل چې تېره شنبه په نفتي توکو بار یوه ټانکر د اور اخیستلو له امله بنده شوې وه، د ټولګټو وزارت او اړوندو نورو ادارو د مرستندویه ډلو له خوا پاککاري او اوسمهال د کوچنیو موټرو لپاره پرانیستل شوه.»</p>
<p style="text-align: justify;">هغه له موټرچلوونکو غوښتي چې د سالنګ لویې لارې د څار او ساتنې ادارې لارښوونو ته جدي پام وکړي او ترافیکی قوانین مراعات کړي.</p>
<p style="text-align: justify;">نوموړی وايي، د اوسمهال لپاره پر دغه لار لویو باروړونکو موټرو ته د تګ راتګ اجازه نه ورکول کېږي، خو له خلاصېدو سره به پر خوراکي توکو بار موټرو ته لومړیتوب ورکوي.</p>
<p style="text-align: justify;">په سالنګ تونل کې- چې د هېواد مرکز له شمالي ولایتونو سره نښلوي - درې ورځې مخکې ماښام مهال يو ټانکر چې سونتوکي په کې بار وو، د تخنيکي ستونزې له امله چپه شو او اور یې واخیست چې د دغه موټر په ګډون په کې ګڼ موټرونه وسوځېدل.</p>
<p style="text-align: justify;">په دې پېښه کې ۳۱ کسان مړه او ۳۷ نور ټپيان شول او دغه لار تر نن ورځې تړل شوې وه.</p>
