<p style="text-align: justify;">کابل (پژواک، د مرغومي لومړۍ نېټه ۱۴۰۱): دوولسو هېوادونو او اروپایي ټولنې په ګډه اعلامیه کې او دغه راز ترکیې د افغانستان له سرپرست حکومته غوښتي چې د نجونو زدهکړو ځنډولو پرېکړه دې بېرته واخلي.</p>
<p style="text-align: justify;">د افغانستان لوړو زدهکړو وزارت وړمه ورځ وویل چې په هېواد کې د نجونو لوړې زدهکړې تر بل امر پورې ځنډول شوې دي.</p>
<p style="text-align: justify;">د وزارت په خبرتیا کې راغلي: «د هېواد ټولو دولتي او خصوصي پوهنتونونو ته خبر ورکول کېږي چې د ۱۴۴۳ هجري قمري کال د کابینې ۲۸مې ګڼې مصوبې پرېکړې له مخې، د اناثو تحصیل هم تر امر ثاني پورې معطل شو.»</p>
<p style="text-align: justify;">دا په داسې حال کې ده چې د نجونو ښوونځیو له شپږم ټولګيو فعالیت د روان ښوونیز کال له پیله ځنډول شوی دی.</p>
<p style="text-align: justify;">د سرپرست حکومت دغه کړنې له غبرګونونو سره مخ شوې دي.</p>
<p style="text-align: justify;">استرالیا، کاناډا، فرانسې، جرمني، ایټالیا، جاپان، هالنډ، ناروې، هسپانیې، سویس، انګلیستان او امریکا د بهرنیو چارو وزیرانو او د اروپايي ټولنې لوړپوړي استازي په یوه ګډه اعلامیه کې د نجونو له شپږم ټولګي پورته او د لوړو زدهکړو ځنډولو په اړه د افغانستان د سرپرست حکومت پرېکړه ناسمه بللې ده.</p>
<p style="text-align: justify;">په اعلامیه کې ادعا شوې چې د افغان نجونو او ښځو پر وړاندې د اسلامي امارت کړنې «بې رحمانه او سیستماتیکې» دي.</p>
<p style="text-align: justify;">سرچینه زیاتوي چې په تېرو ۱۶ میاشتو کې د افغانستان سرپرست حکومت پارکونو ته د ښځو پر تګ د ممنوعیت او ځینو نورو مسایلو په اړه لږ تر لږه ۱۶ فرمانونه صادر کړي چې د ښځو د خوځښت مخه یې نیولې ده.</p>
<p style="text-align: justify;">په اعلامیه کې راغلي: «دا تګلارې د افغانستان خلکو د بشري حقونو او بنسټیزو ازادیو په اړه د طالبانو بې غوري ښیي.»</p>
<p style="text-align: justify;">سرچینه زیاتوي: «د افغان ښځو هوښیارتیا او تحرک ته په عاجله توګه اړتیا لیدل کېږي څو د ژورو او حیرانوونکو اقتصادي او بشري اړتیاوو کمولو په برخه کې ورسره مرسته وکړي.»</p>
<p style="text-align: justify;">په اعلامیه کې راغلي چې افغانستان هغه مهال له اقتصادي پلوه باثبات او سولهییز هېواد کېدای شي چې د ښځو او نجونو په ګډون ټول افغانان وکولای شي په پوره، مساوي او معنالرونکې توګه د هېواد په راتلونکي او پرمختګ کې برخه واخلي.</p>
<p style="text-align: justify;">یادو هېوادونو د افغانستان له سرپرست حکومته غوښتي چې د ښځو او نجونو لپاره د لوړو زدهکړو او دغه راز له شپږم ټولګي پورته د نجونو زدهکړو ځنډولو پرېکړه بېرته واخلي.</p>
<p style="text-align: justify;">په اعلامیه کې راغلي چې د افغانستان اوسني حکومت یادې تګلارې به له دغه حکومت سره د یادو هېوادونو پر تعامل اثر ولري.</p>
<p style="text-align: justify;">سرچینه زیاتوي چې د دوی تر ټولو مهمه اندېښنه د افغانستان د خلکو د هوساینې، حقونو او ازادیو په اړه ده.</p>
<p style="text-align: justify;">ترکیې هم په افغانستان کې د نجونو پر لوړو زدهکړو د بندیز پر پرېکړه اندېښنه څرګنده کړې ده.</p>
<p style="text-align: justify;">د ترکیې د بهرنیو چارو وزارت د یوې اعلامیې په خپرولو سره ویلي چې تعلیم د هر انسان حق دی او هیڅوک باید ترې بې برخې نه شي.</p>
<p style="text-align: justify;">دغه وزارت زیاته کړې چې د هر هېواد سوکالۍ او ښه راتلونکي لپاره د ټولو نجونو تعلیم اساسي اړتیا ده.</p>
<p style="text-align: justify;">د ترکیې د بهرنیو چارو وزارت هیله ښودلې چې د دې پرېکړې اصلاح لپاره دې ژر تر ژره اړین ګامونه واخیستل شي.</p>
<p style="text-align: justify;">له دې مخکې د اسلامي همکاریو سازمان، قطر، متحده عربي اماراتو، ملګرو ملتونو، سعودي عربستان او د بشري حقونو او د بښنې نړۍوالو سازمانونو هم د نجونو زدهکړو ځنډولو یادې پرېکړې ته غبرګون ښودلی او نیوکې یې پرې کړې دي.</p>
<p style="text-align: justify;">د افغانستان سرپرست حکومت تر اوسه د دغو غبرګونونو په اړه څه نه دي ویلي، خو د لوړو زدهکړو وزارت ویاند حافظ ضیاالله هاشمي نن پر خپل ټویټر لیکلي: «تر امر ثاني پورې د اناثو پوهنتونونو بندېدو په اړه به د لوړو زدهکړو سرپرست وزیر نن یا سبا وضاحتي کنفرانس ولري.»</p>
