<p style="text-align: justify;">کابل (پژواک، ۶ مرغومی ۱۴۰۱): د افغانستان کرکټ بورډ وایي، راتلونکې پنجشنبه د هېواد د پنځو زونونو په کچه غوره کلبونو ترمنځ د اتلولۍ جام وروستی پړاو سیالۍ پیلېږي.</p>
<p style="text-align: justify;">کرکټ بورډ نن (سهشنبه) په خپله فېسبوکپاڼه کې لیکلي چې دغه لوبې به په ۲۵ اووریزه بڼه ترسره شي.</p>
<p style="text-align: justify;">سرچینې زیاته کړې، د کورني کرکټ اړوند د ۲۰۲۲ زیږدېز کال د پنځو زونونو غوره کلبونو ترمنځ د اتلولۍ جام وروستی پړاو سیالۍ د روانې مرغومي میاشتې په ۹مه نېټه پیلېږي.</p>
<p style="text-align: justify;">دغه سیالۍ به د راتلونکې پنجشنبې په ورځ، د خوست ولایت په ملي کرکټ لوبغالي کې پیل شي چې شپږ ورځې به دوام وکړي.</p>
<p style="text-align: justify;">د سرچینې د معلوماتو له مخې، په یادو سیالیو کې د پنځو زونونو اتل کلبونه برخه لري چې له دې وړاندې یې د خپلو اړوندو زونونو د کلبونو په کچه خپلمنځي لوبو کې اتلولۍ خپلې کړې وې او د هېواد په کچه غوره کلبونو ترمنځ د اتلولۍ جام سیالیو ته یې لاره موندلې ده.</p>
<p style="text-align: justify;">کرکټ بورډ وایي، دغه سیالۍ په روان ۲۰۲۲م زېږدیز کال کې د کورني کرکټ وروستۍ لوبې دي چې د هېواد ګڼ شمېر ملي او کورني لوبغاړي به په کې ولوبېږي.</p>
<p style="text-align: justify;">د یادونې ده، د روانې ډسمبر میاشتې په ۱۴مه د کورني کرکټ اړوند د ۲۰۲۲ زېږدیز کال د مس عینک زون اړوندو کلبونو اتلولي بیا د خوست ولایت ډېنجر کلب وګټله.</p>
