کندهار (پژواک، ٢٣ مرغومى ١٤٠١): د کندهار په بېلابېلو ولسوالیو کې ۳۶ کسان چې له یخنۍ د ځان ساتلو امکانات یې نه درلودل او له خطر سره مخ وو، ژغورل شوي دي.
د کندهار ولایت مقام ویاند حاجي زید پژواک ته وویل، په دغه ولايت کې د سړې هوا له څپې سره سم ولایتي مسوولینو په ټولو ولسوالیو کې روغتیايي او د مرستې ټیمونه ګومارلي څو هغه کسان وژغوري چې له يخنۍ سره مخ دي.
هغه زیاته کړه، په دې کسانو کې ۱۵ کوچنیان چې د لوړ میوند په نصرو کارېز سیمه کې د یخ له امله له جدي ګواښ سره مخ وو، کلينیک ته انتقال شول.
ده وویل: «له تېرې ورځې راهیسې روغتیايي ټیمونو او مجاهدینو په بېلابېلو ولسوالیو کې ۳۶ تنه ژغورلي او هغوى ته یې خوراکي توکي، درمل او له یخ څخه د ساتنې کمپلې ورکړې دي.»
د هغه په وینا، په ولسوالیو کې اوس هم روغتیايي او نور مرستندوی ټیمونه په کار بوخت دي او اړو کسانو ته خوراکي او نور توکي رسوي.
د والي ویاند وايي، دغه راز تېره شپه له هغې کورنۍ سره هم د کندهار د والي په لارښوونه د خوراکي او نورو توکو مرسته وشوه چې د سړې هوا له امله له ستونزو سره مخ وه.
د کندهار په دوولسمه حوزه کې د محمدشاه په نوم د یوه کس د دوو میاشتو ماشومه د چهار شنبې په ورځ د سرپناه نه لرلو او ناروغۍ له امله مړه شوې وه.
د والي ویاند حاجي زید په دې اړه وایي: «له دغه کورنۍ سره د نغدي پیسو او خوراکي توکو مرسته وشوه، د تودېدو لپاره بخارۍ ورته برابره شوه او هم ورسره د کمپلو او نورو اړینو توکو همکاري وشوه.»
پر همدې مهال د کندهار د ارغنداب ولسوال ملا ادم اخند وایي، دوی له مرستندویې ډلې سره د دې ولسوالۍ په لرو پرتو سیمو کې ګرځي څو له هغو کسانو سره مرسته وکړي چې د یخ له امله له خطر سره مخ دي.
هغه زیاته کړه: «روغتیايي ټیم راسره دی او د ولس حال له نږدې اخلو څو د دوا یا نور کومک ورسره وکړو.»
بلخوا تېره شپه د کندهار ښار په عینو مېنه کې په یوه کور کې صندلۍ اور اخیستی چې له امله یې درې کسان سوځولېدلي خو وروسته روغتون ته انتقال شول او دا مهال يې روغتيايي وضعيت ښه دى.
غړيYou need to subscribe to view the full article. Please login or register a new account.
