<p style="text-align: justify;">مزارشریف (پژواک، ۴ سلواغه ۱۴۰۱): د بلخ حکومتي مسوولین وایي، په دغه ولایت کې د کافرکلا لرغوني تاريخي ابدې خوندیتوب په موخه د قوشتیپې کانال مسير یو څه بدل شوى دى.</p>
<p style="text-align: justify;">د بلخ د اطلاعاتو او فرهنګ ریاست د هنر او فرهنګ مدیر ذبیحالله اریایي پژواک خبري آژانس ته وویل چې د قوشتیپې کانال کیندلو چارې د دولتاباد ولسوالۍ تر کافرکلا تاریخي سیمې پورې رسېدلې وې خو اوس یې مسیر د دې کلا خوندیتوب په موخه بدل شوی دی.</p>
<p style="text-align: justify;">هغه زیاته کړه، دا مهال د دغه کانال کیندنې چارې د کافرکلا شمال لور ته، له یادې کلا په ۲۰۰ متره لرې فاصله کې روانې دي.</p>
<p style="text-align: justify;">بلخوا، د بلخ یو شمېر فرهنګیان کافرکلا يوه مهمه تاريخي ابده بولي.</p>
<p style="text-align: justify;">لیکوال او فرهنګپال صالح محمد خلیق وایي، کافرکلا د کوشانیانو وخت پوځي پنډغالی و چې لرغونتیا یې له اسلامه سلګونه کاله مخکې ته رسېږي.</p>
<p style="text-align: justify;">هغه زیاتوي، دغه کلا تاریخي او فرهنګي اهمیت لري او په داسې یوې لرغونې سیمې کې واقع ده چې شاوخوا لس زره کاله مخینه لري.</p>
<p style="text-align: justify;">دغه راز، د دولتاباد ولسوالۍ ځایي مسوولین په دې ولسوالۍ کې د بشپړ او ډاډمن امنیت له ټینګښته خبر ورکوي.</p>
<p style="text-align: justify;">د دولتاباد ولسوالۍ امنیه قوماندان ملا خیرالدین روحاني وایي چې په یاده ولسوالۍ کې بشپړ امنیت تامین دی او هېوادوال کولای شي د کافرکلا پر تاریخي سیمې سربېره د دې ولسوالۍ له نورو لرغونو سیمو هم لیدنه وکړي.</p>
<p style="text-align: justify;">د قوشتیپې کانال مسیر په داسې حال کې بدلېږي چې له دې مخکې په ټولنیزو رسنیو کې یو شمېر کسانو د دې کلا ویجاړېدو په اړه اندېښنې ښودلې وې.</p>
<p style="text-align: justify;">نجیب ساجد پر خپلې فېسبوکپاڼه لیکلي وو: «کافرکلا د کوشانیانو په دوره کې د قره خانانو د بریدونو شنډولو او د بلخ د دښمنانو له بریدونو د ساتنې په موخه جوړه شوې وه؛ له بده مرغه د قوشتیپې د اوبو لګولو کانال د دې کلا ختیځه برخه، په ځانګړې توګه دېوالونه ویجاړوي؛ که څه هم د کانال د لارې بدلولو امکان شته، خو ظاهراً چا ورته پام نه دی کړی او د قوش تپې د ملي پروژې له امله د هېواد یوه لرغونې سیمه د ویجاړېدو په حال کې ده.»</p>
<p style="text-align: justify;">د قوشتیپې کانال ملي پروژه په درې فازونو کې جوړېږي چې دا مهال یې د لومړي فاز کیندنې نږدې ۵۰ سلنه چارې بشپړې شوې دي.</p>
