د سړې هوا له امله د افغانستان په ۲۴ ولایتونو کې ۱۵۸ کسان مړه شوي

[restrict paid="true"]

اټلانټا (پژواک، ۶ سلواغه ۱۴۰۱): د طبیعي پېښو پر وړاندې د مبارزې وزارت وايي، په روان ژمي کې د سختې سړې هوا له امله په تېرو شاوخوا دوو اونیو کې ۱۵۸ کسان مړه شوي دي.

د دې وزارت د بودجې رییس او د بشري مرستو د همغږۍ مسوول عبدالرحمن زاهد ویلي، د جنورۍ له لسمې نېټې راهیسې په ۲۴ ولایتونو کې د سړې هوا، سیلاب، اورلګېدنې او د ژمي اړوند نورو ستونزو له امله ۱۵۸ کسان مړه او ۲۷ نور ټپیان شوي دي.

په افغانستان کې له تېرو شاوخوا دوو اونیو راهیسې د سړې هوا څپه راغلې چې له امله یې خلک له سختو ستونزو سره مخ شوي دي.

د وړاندوینو له مخې، د روانې اونۍ په پای کې به د افغانستان په ځینو سيمو کې د تودوخې درجه د ساتني ګراد په کچه منفي ۳۵ ته راکښته شي.

له بلې خوا، د پژواک د خپرو شویو راپورونو له مخې، ولایتي مسوولینو ویلي چې د سړې هوا له امله د ځاني مرګ‌ژوبلې ترڅنګ لسګونه زره څاروي هم له منځه تللي دي.

ملګري ملتونه وايي، افغانستان په تېرو ۱۵ کلونو کې په داسې حال کې سوړ ژمی تېروي چې لږ تر لږه ۶ میلیونه نفوس یې له وچکالۍ سره مخ دی.

په بشري چارو کې د ملګرو ملتونو مرستیال مارتین ګریفتس ويلي: «په افغانستان کې ژمي هر څه ډېر ستونزمن کړي دي. موسم او وخت لکه څنګه چې وینو یو شمېر کسان تلف شوي هم دي چې موږ ورته ډېر متوجه یو. نږدې شپږ میلیون کسان چې دا ډېره لوړه شمېره ده،‌ له قحطۍ سره مخ دي. تر هغه ځایه چې زه پوهیږم، له قحطۍ سره د دغو شپږو میلیونو کسانو مخېدل بې‌سارې دي.»

[/restrict]