<p style="text-align: justify;">هرات ښار (پژواک، ۱۶ سلواغه ۱۴۰۱): د صنعت او سوداګرۍ وزارت سرپرست هرات ولایت ته په سفر کې ویلي چې له سوداګرو او متشبثینو ملاتړ کوي او ستونزو ته به یې ډېر ژر رسېدنه وشي.</p>
<p style="text-align: justify;">د هېواد د صنعت او سوداګرۍ وزارت سرپرست نورالدین عزیزي هرات ته په خپل سفر کې د دغه ولایت له سوداګرو سره لیدلي او د هغوی ستونزې یې ارزولې دي.</p>
<p style="text-align: justify;">د عزیزي په خبره، اداره یې له خصوصي سکټوره دفاع او د هېواد په هر ولایت کې پر کاروبار بوخت له هر متشبث څخه ملاتړ کوي.</p>
<p style="text-align: justify;">د صنعت او سوداګرۍ وزارت سرپرست څرګنده کړه چې اسلامی امارت د کورنیو تولیداتو مصرف ته لومړیتوب ورکوي او هڅه کوي چې په هېواد کې دننه او بهر سوداګرو لپاره لازمې اسانتیاوې برابرې کړي.</p>
<p style="text-align: justify;">له بلې خوا، یو شمېر سوداګر وایي چې د برېښنا د پرې کېدو ستونزې له امله د دغه ولایت په صنعتي ښارګوټي کې د ځینو تولیدي کارخانو فعالیتونه ټکني شوي دي.</p>
<p style="text-align: justify;">د یاد ولایت د صنعتي ښارګوټي د خوراکي توکو یوې کارخانې ونډهوال، منیر رسا له پژواک سره په خبرو کې وویل چې د برېښنا پرې کېدو د دغه ولایت په صنعتي ښارګوټي کې د ټولو فابریکو څښتنان او ونډهوال اندېښمن کړي دي.</p>
<p style="text-align: justify;">د رسا په خبره، په ورځنیو کارونو کې خنډ او ځنډ، د دوی اوږدمهاله پلانونه او پروګرامونه ټکني کړي دي او لګښتونه لوړوي.</p>
<p style="text-align: justify;">هغه ټینګار وکړ چې حکومت باید له سوداګرو ملاتړ او د ښارګوټي ستونزو ته جدي پاملرنه وکړي.</p>
<p style="text-align: justify;">په ورته مهال، د صنعت او سوداګرۍ وزارت سرپرست وایي، ګاونډي هېوادونه د برېښنا په تولید کې ستونزه لري، له همدې امله په صنعتي ښارګوټي کې هم د برېښنا پرې کېدو ستونزه شته، خو صنعتي ښارګوټي ته به ډېر ژر ځانګړې برېښنا وصل شي.</p>
<p style="text-align: justify;">په همدې حال کې، د هرات د خوراکي توکو سوداګرو اتحادیې رییس نجیبالله خیراندېش وایي چې سوداګرو د مالیې په ورکولو سره له اسلامي امارته ملاتړ کړی، نو ځکه باید د سوداګرو ستونزو ته په دغه ښارګوټي کې رسېدنه وشي څو کاروبار یې ښه شي.</p>
<p style="text-align: justify;">د یادونې ده، د هرات صنعتي ښارګوټی د ۳۰۰ لویو او کوچنیو فابریکو په لرلو سره د افغانستان یو اقتصادي قطب ګڼل کېږي.</p>
