<p style="text-align: justify;">کندوز (پژواک، ۱۹ سلواغه ۱۴۰۱): د کندوز د شېرخان بندر ګمرک ریاست مسوولین د دغې ادارې د کمساري عوایدو خبر ورکوي او وایي، په تېرو ۱۶ میاشتو کې یې نږدې دوه میلیارد افغانۍ عواید راټول کړي دي.</p>
<p style="text-align: justify;">د کندوز د شېرخان بندر ګمرک رییس مولوي اسحاق له پژواک اژانس سره په خبرو کې وویل، په وروستیو ۱۶ میاشتو کې یې نږدې دوه میلیارد افغانۍ عواید راټول کړي دي.</p>
<p style="text-align: justify;">هغه وایي، دغه رقم له هغه ۱۶ مخکې ۸۱۲ میلیون افغانۍ وې چې اوس د دغې ادارې عواید ۵۸ سلنه ډېروالی ښيي.</p>
<p style="text-align: justify;">نوموړي د یادې ادارې د عوایدو ډېرېدو لامل سوداګرو ته د اسانتیاوو برابرول او د اداري فساد مخنیوی بولي.</p>
<p style="text-align: justify;">هغه زیاته کړه: «موږ هڅه کوو چې سوداګرو ته لا ډېرې اسانتیاوې برابرې کړو، د ویزې په برخه کې د هغوی ستونزې حل کړو، انشاءالله موږ هیلهمن یو چې په راتلونکي کې د عوایدو کچه له دې هم ډېره وي.»</p>
<p style="text-align: justify;">په ورته وخت کې، د کندوز د سوداګرۍ او پانکونې خونې سرپرست عبدالمتین یوسفزی وايي، د یاد بندر دواړو غاړو ته د ویزې نه ورکول او ځینې نورې ستونزې د سوداګرو پر مخ جدي ننګونې دي. هغه له مسوولینو غواړي چې دغو ستونزو ته رسېدنه وکړي.</p>
<p style="text-align: justify;">نوموړي زیاته کړه: «شېرخان بندر کې د سوداګرو مخې ته ځينې ستونزې شته، سوداګرو او موټرچلوونکو ته نه له دې غاړې او نه له هغې غاړې ویزه صادرېږي؛ بله ستونزه د تاجکستاني ډبرو سکرو د ټرانیزټ تعرفې لوړېدل دي، مخکې د سکرو تعرفه ۶ ډالره و خو اوس ۴۰ ډالرو ته رسېدلې ده.»</p>
<p style="text-align: justify;">شېرخان بندر د هېواد په شمال کې یو له مهمو بندرونو څخه دی چې افغانستان او تاجکستان سره نښلوي.</p>
