کلات (پژواک، ۲۳ کب ۱۴۰۱): د زابل سیوري ولسوالي د دغه ولایت د رسمي ولسوالۍ په توګه منظور شوه او نن د کب په ۲۳مه پکې په دې اړه غونډه جوړه شوې وه چې د والي او نورو چارواکو ترڅنګ ځايي مشرانو او مخورو ګډون کړی وو.
د دغې نوې منظور شوې ولسوالۍ مشرانو او عامو اوسېدونکو په غونډه کې له مسوولینو وغوښتل چې دوی ته ټولنیز خدمات وړاندې کړي.
د سیوري ولسوالۍ یوه قومي مشر حاجي عبدالرزاق وویل، خوښ دی چې د ولسونو له ډېرو هڅو وروسته سیوری د زابل د رسمي ولسوالۍ په توګه ومنل شوه او نن یې پرانیستغونډه ده.
خو هغه غوښتنه وکړه چې اوس باید مسوولین د نورو ولسوالیو په څېر په دغې ولسوالۍ کې هم خلکو ته ټولنیز خدمات وړاندې کړي.
نوموړي زیاته کړه، د ولسوالۍ نفوس ته په کتو باید دغلته د روغتیا، پوهنې، کرنې او نورو پرمختیايي برخو کې خدمات وړاندې شي.
د یادې ولسوالۍ یوه بل اوسېدونکي محمدطاوس هېوادمل وویل، سیوری د زابل له تاریخي ولسوالیو ده چې د مسوولینو ډېرې پاملرنې ته اړتیا لري.
هغه زیاته کړه: «په دغې نوې منظور شوې ولسوالۍ کې باید خلکو ته روغتیايي مرکزونه، ښوونځي او مدرسې جوړې شي، مخابراتي خدمات دې پراخ شي او ټولې اړینې پرمختیايي او پراختیايي چارې پلې شي.»
نوموړي دغهراز غوښتنه وکړه چې یادې ولسوالۍ ته دې رسمي تشکیلات ورکړل شي او د وزارتونو څانګې دې پکې پرانیستل شي.
د زابل والي مولوي قدرتالله حمزه وویل: «د سیوري ولسوالۍ خلکو ډېرې قربانۍ ورکړې او د اسلامي امارت لومړنی مشر ملا محمدعمر یې په خپله غېږه کې وساته.»
هغه زیاته کړه، د دغې نوې رسمي شوې ولسوالۍ اړوند د تشکیل او ټولنیزو خدماتو په تړاو د خلکو غوښتنې به تر مرکزي مسوولینو ورسوي.
هغه خبر ورکړ چې د یادې ولسوالۍ پر تشکیل کار روان دی، د نوي ولسوال منظوري راغلې چې ژر به خلکو ته ور وپېژندل شي.
نوموړي یادونه وکړه چې په نوي ۱۴۰۲ لمریز کال کې به په یادې ولسوالۍ کې ګڼ بیارغنیز او پرمختیايي کارونه وشي او خلکو ته به د ژوند اسانتیاوې برابرې شي.
زابل د هېواد په سوېلخیتځ کې پروت دی چې د کابل- هرات لار ورڅخه تېرېږي او تر دې وړاندې یې د مرکز کلات په ګډون یوولس اداري واحدونه درلودل چې اوس یې شمېر دوولسو اداري واحدونو (کلات، شاهجوۍ، شینکۍ، شملزي، اټغر، نوبهار، خاک افغان، دایچوپان، ارغنداب، مېزانه، ښار صفا او سیوري) ته لوړ شو.
غړيYou need to subscribe to view the full article. Please login or register a new account.
