<p style="text-align: justify;">کندهار (پژواک، ۲۴ کب ۱۴۰۱): د کندهار په شاوليکوټ ولسوالۍ کې د دهلې بند لوی پُل -چې د تېرو جګړو پر مهال د چاودنې له امله ویجاړ شوی و- بیا ورغول شو او نن ګټې اخیستنې ته وړاندې شو.</p>
<p style="text-align: justify;">د کندهار د اقتصاد ریاست ویاند کمالشاه سادات پژواک خبري اژانس ته وویل، دغه پُل د اقتصاد ریاست په هڅو د ملګرو ملتونو د پرمختیايي سازمان/ UNDP په مالي مرسته جوړ شوی دی.</p>
<p style="text-align: justify;">هغه زیاته کړه، یاد پُل چې ۲۱ متره اوږدوالی او ۵ متره سور لري، د څلورو میاشتو په موده کې د ۵۲ زره امریکايي ډالرو په لګښت د ډنمارک کډوالو شورا/ DRC په تخنیکي همکارۍ رغول شوی دی.</p>
<p style="text-align: justify;">د هغه په وینا، د یاد پله د رغونې پر مهال د سیمې ۴۳ کسانو د کار زمینه هم برابره شوې وه.</p>
<img class="aligncenter wp-image-524095 " src="https://pajhwok.com/wp-content/uploads/2023/03/پل-تخریب-شده-در-کندهار-1.jpg" alt="" width="519" height="389" />
<p style="text-align: justify;">نوموړي وویل، د یاد پله د پرانیستې په مراسمو کې د اقتصاد رییس عبدالسلام بریالي پر نورو موسسو هم غږ وکړ چې په کندهار ښار او ولسوالیو کې پر هغو پروژو کار وکړي چې خلک ډېره اړتیا ورته لري.</p>
<p style="text-align: justify;">له یاد پله د شاوليکوټ ولسوالۍ د شپږو کلیو اوسېدونکي او د دهلې بند مېلهوال ګټه اخلي چې خلک يې رغول ډېر مهم بولي.</p>
<p style="text-align: justify;">د شاوليکوټ ولسوالۍ یو اوسېدونکی جانمحمد وایي، د دغه پله له ویجاړېدو وروسته خلکو پر ډېرو خرابو لارو تګ راتګ کاوه خو اوس به د خلکو ستونزې حل او لار به هم ورته لنډه شي.</p>
<p style="text-align: justify;">په دې وروستیو کې په کندهار ښار او ولسوالیو کې ډېری هغه پلونه او پلچکونه رغول شوي چې په جګړو کې ویجاړ شوي وو، خو د ډېری ولسوالیو سړکونه چې د ماین چاودنو له امله تخریب شوي، لا هم همداسې پاتې دي او خلک یې د ترمیم غوښتنه کوي.</p>
