تخار کې د بېګانۍ زلزلې له امله یوه کس مړ او پنځه نور ټپیان شوي

تالقان (پژواک، ۲ وری ۱۴۰۲): په تخار کې سرچینې وایي، په دغه ولایت کې د تېرې شپې زلزلې له امله یو کس مړ او پنځه نور ټپيان شوي دي.

د تخار د تخصصي روغتون امر ډاکټر حیات‌الله امامي پژواک خبري اژانس ته وویل: «د تېرې شپې د زلزلې له امله تر اوسه دغه روغتون ته یو جسد او پنځه ټپيان راوړل شوي دي.»

هغه زیاته کړه، په ټپیانو کې درې محصلین هم شامل دي چې د زلزلې پر مهال یې د لیلیې له ودانۍ څخه ځانونه غورځولي دي.

د تخار طبیعي پېښو ته د رسېدنې رییس ملا احمدسیر ساجد هم وویل چې د تېرې شپې زلزلې له امله خلکو ته مالي او ځاني زیانونه اوښتي، خو زیاته یې کړه چې په دې اړه د کره شمېرې په اړه معلومات نه لري.

د تېرې شپې نسبتاً زورورې زلزلې د کابل په ګډون ډېر ولایتونه و لړزول او د زلزلې مرکز بدخشان ښودل شوی دی.