اټلانټا (پژواک، ۱۰ وری ۱۴۰۲): د امریکا ددفاع وزیر لویډ اسټین دکانګریس غړو ته ویلي چې دوی له افغانستان څخه په ناببره توګه د ځواکونو دویستلو له پروسې پښېمانه نه دي.
دبي بي سي د خبر له مخې، نوموړي پرون د امریکا استازو جرګې د پوځي خدمتونو کمېټې د جمهوري غوښتونکو غړو له لوري وربلل شوی و، د نورو پوښتنو تر څنګ له افغانستانه د امریکايي ځواکونو کاواکه وتل هم ډېرو استازو ته مهمه پوښتنه وه.
د ۲۰۲۱ کال په اګست کې له افغانستانه د امریکایي ځواکونو ناببره او په بیړه وتلو له کبله د ولسمشر جوبایډن اداره په امریکا او له امریکا بهر له پراخو نیوکو سره مخ ده.
د ځواکونو د وتلو پر مهال تر ټولو لویه پېښه چې امریکایان یې سپیناوی غواړي د هغه برید موضوع ده چې د کابل نړیوال هوایي ډګر کې وشو او په پایله کې یې ۱۳ امریکايي سرتیري او نږدې ۱۷۰ولسي افغانان ووژل شول.
پرون د امریکا استازو جرګې د پوځي خدمتونو کمېټې، جمهوري غوښتونکو غړو دفاع وزیر لوید استین په سختو پوښتنو وننګوه.
په دې منځ کې د امریکا د انډیانا ایالت جمهوري غوښتونکي استازي او پخواني جنرال جیم بنکس چې په افغانستان کې یې هم دنده ترسره کړي له اسټین وپوښتل:” ایا تاسو د پوځیانو د ایستلو په اړه کومه پښېمانې لرئ؟”
د امریکا دفاع وزیر په ځواب کې ورته ویلي: ” زه د ولسمشر بایډن له پرېکړې ملاتړ کوم، زه په دې اړه هیڅ پښېماني نه لرم.”
د امریکایي ولسمشر جوبایډن دغه لوړ پوړی پوځي مشر داسې مهال د پوځي خدمتونو کمېټې وربللی وو چې همدا روانه اونۍ د استازو جرګې د بهرنیو اړیکو کمېټې بهرنیو چارو وزیر انتوني بلینکین په ورته موضوع وربللی وو.
په امریکا کې ددې موضوع په تړاو جنجالي بحثونه له ډېره وخته را روان دي چې د کره جزیاتو او سپیناوي لپاره وخت ناوخت په مشرانو او ولسي جرګو دواړو کې جمهوري غوښتونکي استازي اړوند ملکي او پوځي چارواکي ورغواړي.
د کانګرس د بهرنیو اړیکو د خدمتونو د کمیټې مشر او جمهوري غوښتونکی غړی مایکل مکال همدا روانه میاشت په یوه ورته غونډه کې د بایډن د حکومت له خوا د تخلیې او وګړو ایستلو پر بهیر سختې نیوکې وکړي او دا کار یې د بایډن حکومت ماتې بللې وه.
سیګار یا د افغانستان پر بیا رغونه د څار امریکایۍ ادارې او نورو خپلواکو بنسټونو هم د ډونالډ ټرمپ او جوبایډن ادارې د افغانستان د پخواني پوځ د لیکو پر ماتېدو او پر افغانستان د طالبانو بیا واکمنیدو اصلي لاملونه بللي.
خو د ولسمشر بایډڼ اداره بیا له افغانستانه د امریکايي پوځیانو وتل خپله لویه لاسته راوړنه بولي چې ګواکي د امریکا ګټې یې خوندي کړې او په مقابل کې په افغانستان کې چې څه پېښ شوي پړه یې تر ډېره د افغانستان په پخواني جمهوري دولت اچوي چې ګواکې د سولې او پخلاینې بهیر ته یې ژمنیتا نه درلوده او د طالبانو پر وړاندې یې مقاومت هم ونه کړ.
Visits: 310
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن