[restrict paid="true"]
<p style="text-align: justify;">اټلانټا (پژواک، ١١ وری ۱۴۰۲): د افغانستان کرکټ ستوري راشدخان د هند شل اوریزو سوداګریزو سیالیو لومړۍ لوبه کېغوره لوبغاړی اعلان شو.</p>
<p style="text-align: justify;">د هند سوداګریز لیګ (ایپياېل) تېر ماښام د افغانستان پر وخت د ماښام شپږنيمې بجې پيل شو.</p>
<p style="text-align: justify;">د دې سیالیو لومړۍ لوبه د ګجرات او چینای لوبډلو ترمنځ وشوه؛ د لوبې پچه یا ټاس د ګجرات لوبډلې وګټله او لومړی یې د توپاچونې پرېکړه وکړه.</p>
<p style="text-align: justify;">د چینای لوبډلې په ټاکل شوو ۲۰ اورونو کې د اوو لوبغاړو په سوځېدو سره ۱۷۸ منډې جوړې کړې او ګجرات ته یې د ۱۷۹ منډو هدف ورکړ.</p>
<p style="text-align: justify;">د ګجرات لوبډلې افغان لوبغاړي راشدخان ډېره ښه توپاچونه وکړه؛ په څلورو اورونو کې یې ۲۶ منډې ورکړې او د چنایي دوه پیاوړي لوبغاړي یې وسوځول.</p>
<p style="text-align: justify;">د ګجرات لوبډلې یاد هدف په شلم اوور کې د څلورو لوبغاړو په سوځېدو سره پوره کړ او لوبه یې وګټله.</p>
<p style="text-align: justify;">راشدخان په داسې حال کې چې د ګجرات لوبډلې ته په کمو توپونو زیاتې منډې پکار وې، په نولسم اوور کې یوه شپږیزه او یوه څلوریزه ووهله او لوبه یې خپلې لوبډلې ته اسانه کړه.</p>
<p style="text-align: justify;">راشدخان د دې لوبې غوره لوبغاړی اعلان شو او د جایزې ترلاسه کولو پر مهال یې وویل: «دا ماته د راتلونکو لوبو لپاره ډېره انرژي راکوي؛ چپ لاس لوبغاړو ته بالینګ کول سخت وي خو ما پرېکړه کړې وه چې په سمو ځایونو کې به توپ اچوم.»</p>
<p style="text-align: justify;">د هند کرکټ بورډ له خوا د شل اوریزو سیالیو دغه لیګ په ۲۰۰۷ زېږدیز کال کې پیل شوی دی.</p>
<p style="text-align: justify;">د معلوماتو له مخې، په دغه لیګ کې لس لوبډلې برخه لري او هره لوبډله به ۱۴ سیالۍ ترسره کوي.</p>
<p style="text-align: justify;">ګجرات لوبډلې تېر کال او چيناى لوبډلې وړم کال د يادو سياليو اتلولي ترلاسه کړې وه.</p>
<p style="text-align: justify;">په دغه لیګ کې د راشدخان ترڅنګ بل ورو توپاچوونکی نوراحمد لکڼوال د ګجرات ټایټنز لوبډلې، فضلالحق فاروقي سن رایزرز حیدراباد، نوینالحق د لکناو سوپر جېنټس او رحمانالله ګربز د کلکتې نایټ رایډرز لوبډلو له لوري اخیستل شوي دي.</p>
<p style="text-align: justify;">همدارنګه په دغو سیالیو کې پر افغان لوبغاړو سربېره د نړۍ د کرکټ مشهور لوبغاړي هم په بېلابېلو لوبډلو کې اخیستل شوي دي.</p>
[/restrict]
