ښرنه (پژواک، ۱۹ وری ۱۴۰۲): د پکتیکا د پوهنې ریاست مسوولین وايي، سږ کال په دغه ولایت کې ښوونځیو ته د نوو شامل شوو زدهکوونکو په شمېر کې ۴۰ سلنه ډېروالی راغلی دی.
د یاد ولایت د پوهنې رییس مولوي عبدالقیوم فاروقي پژواک خبري اژانس ته وویل، د نوي ښوونیز کال له پیلېدو سره د کورنیو له لوري په ښوونځيو کې د ماشومانو شاملولو لړۍ پیل شوې چې تر دا مهاله د جدیدالشمول زدهکوونو شمېر ۳۰ زرو ته رسېږي.
هغه وايي، له دغو ۳ زرو ماشومانو ۱۸ زره یې هلکان او ۱۲ زره نجونې دي چې په مرکز او ولسوالیو کې تازه ښوونځیو ته شامل شوي دي.
نوموړی زیاتوي: «تېر کال په پکتیکا کې د جدیدالشمول زدهکوونکو شمېر ۱۸ زره تنه وو، خو سږ کال ۳۰ زره ته لوړ شوی چې د تېر په پرتله په کې ۴۰ سلنه ډېروالی راغلی دی.»
د فاروقي په خبره، د نوو جذب شوو زدهکوونکو د شمېر لوړوېدو لامل د هغو ښوونځیو بېرته پرانیستل دي چې په تېرو کلونو کې بند وو.
خو نوموړي یادونه وکړه چې په پکتیکا کې په داسې حال کې د جدیدالشمول زدهکوونکو شمېر د ډېرېدو په حال کې دی چې د دغه ولایت ۳ ولسوالۍ (ډیله، خوشامند او وړممۍ) لېسې نه لري او په بېلابېلو سیمو کې بیا ۱۵۲ ښوونځي ودانۍ نه لري او زدهکوونکي یې په پرانیستې فضا کې زدهکړې کوي.
خو هغه وویل، د یونيسیف موسسې په مرسته یې ځینو ښوونځيو ته خېمې ورکړې او پلان لري چې پر بېسرپنا ښوونځیو یو شمېر نورې خېمې هم ووېشي څو د اوس لپاره زدهکوونکي له لمر او بارانونو خوندي شي.
هغه همداراز یادونه وکړه چې د سږني ښوونېز کال په اوږدو کې به ۶ نوي لومړني ښوونځي جوړ شي، ۵ منځني ښوونځي به پر لېسو او ۴ لومړني ښوونځي به پر منځنیو ښوونځیو بدل شي.
فاروقي دا هم وویل چې په دغه ولایت کې د حکومت ترڅنګ یو شمېر موسسې هم د پوهنې په برخه کې پر کار بوختې دي او ۳۲ زره زدهکوونکو ته یې د زدهکړې زمینه برابره کړې ده.
هغه وايي، یونسیف، یونسکو، د افغانستان لپاره د سویډن کمېټه او ځینې نورې هغه ادارې دي چې د مرکز او ولسوالیو په هغو سیمو کې چې ښوونځي پکې ننشته،۸۳۰ سیمهییز ټولګي فعال کړي دي.
بلخوا، په خپله خلک هم د ښوونځیو د ودانیو له نشتوالي سر ټکوي او وايي، ماشومان یې تر شنه اسمان لاندې په لمر او بارانونو کې پر زدهکړو بوخت دي.
د اوومنې ولسوالۍ اړوند د ګیناوې سیمې یو مخور حاجي شدیم وايي، د دوی د سیمې ښوونځي لپاره ودانۍ جوړېده خو کارونه یې په نیمه کې پاتې شوي چې تر دې دمه یې د سیمې ماشومان په لمر او بارانونو کې له سرپناه پرته زدهکړې کوي.
هغه زیاتوي، که د ماشومانو لپاره د ښوونځیو ودانۍ جوړې شي، لرې نه ده چې دغه کار به د پوهنې په برخه کې د پام وړ پرمختګونه را منځته کړي او ډېر شمېر هغو ماشومانو ته د زدهکړې ښه چاپېریال برابر شي چې اوس په ښوونځیو کې د روښانه راتلونکي په هیله د لمر سوځوونکو وړانګو، بارانونو او تېزو بادونو ته پر زدهکړو بوخت دي.
د وړممۍ ولسوالۍ قومي مشر حاجي بلوڅ بیا پژواک ته وویل، د دوی د ولسوالۍ لپاره تر دې دمه د لېسې دورې امکانات نه دي برابر شوي او دوی ورته سخته اړتیا لري.
هغه وایې: «زموږ ولسوالۍ لرې پرته ولسوالي ده، تر اوسه مو زیات شمېر ماشومانو د لېسې مخ هم نه دی لېدلی چې له امله یې زموږ په سیمو کې د سواد کچه ټيټه پاتې شوې ده.»
د یادونې ده، د پکتیکا ولایت په مرکز او ولسوالیو کې ټولټال ۴۱۲ ښوونځي فعالیت کوي چې ۷۵ یې لېسې دي او ۱۷۰ زره زدهکوونکي پکې پر زدهکړو بوخت دي.
غړيYou need to subscribe to view the full article. Please login or register a new account.
