پلعلم (پژواک، ۲۲ وری ۱۴۰۲): د لوګر د کرنې، اوبو لګولو او مالدارۍ ریاست وایي، د ملګرو ملتونو د خوړو نړۍوال پروګرام/ WFP له لوري په یوه تازه ګام کې د دغه ولایت په مرکز او درېیو ولسوالیو کې د ځمکو او باغونو اوبولو د ۱۵۰ کانالونو پاکولو چارې پیل شوې.
د دغه ریاست د طبیعي سرچینو امر نصرالدین بهیج پژواک خبري اژانس ته وویل، دا کانالونه د پلعلم ترڅنګ په محمداغه، خوښۍ او خروار ولسوالیو کې موقعیت لري چې له تېرو دوو اونیو راهیسې یې د پاکولو چارې پيل شوې دي.
هغه زیاته کړه، دغه کانالونه چې ټولټال ۱۵۰ کیلومتره اوږدوالی او ۵ متره سور لري، د خوړو نړۍوال پروګرام له لوري د راتلونکو شپږو میاشتو په ترڅ کې د پاکولو چارې بشپړې او ګټې اخیستنې ته سپارل کېږي.
هغه زیاته کړه، په پیل شوې پروژه کې شاوخوا دوه زره وزګارو کسانو ته د کارکولو زمینه برابره شوې ده او هر کارګر ته د میاشتې ۸۵۰۰ افغانۍ تنخوا ورکول کېږي.
د پلعلم د بابوس سیمې یوه کروندګر رسول ګل پژواک خبري اژانس ته وویل، خوښ دی چې د دوی د کلي کانال پاکولو عملي چارې پيل شوي دي.
نوموړي زیاته کړه، په دغه کانال کې لسګونه وزګارو کسانو ته د کارکولو زمینه برابره شوې ده او د یاد کانال له پاکولو وروسته به د کرنې لپاره د اوبو ضایعاتو بشپړ مخنیوی وشي.
د محمداغې ولسوالۍ یوه اوسېدونکي عبدالطیف پژواک خبري اژانس ته وویل، په دې وروستیو کې لوګر ولایت کې د وزګارتیا کچه د پام وړ لوړه شوې ده او د خوړو نړۍوال پروګرام په مالي لګښت د پيل شوې پروژې په ترڅ کې د ده په ګډون سلګونه وزګارو او اړو کسانو ته د کارکولو زمینه برابره شوې ده.
هغه وایي، هره ورځ شپږ ساعته کار کوي او د میاشتې ۸۵۰۰ افغانۍ د تنخوا په توګه ورکول کېږي.
نوموړي دغه راز زیاته کړه: «زموږ غوښتنه دا ده چې یاده پروژه دې د لوګر پاتې ولسوالیو ته هم وغځول شي، یو خو به د وزګارتیا کچه ټيټه شي او بل به د کرنیزو ځمکو خړوبولو پر مهال د اوبو د ضایعاتو بشپړ مخنیوی وشي.»
باید وویل شي چې په تېرو کلونو کې یاد کانالونه د کروندګرو او بڼوالو له لوري د ځمکې کرکیلې او د اوبو د اړتیا له مخې په کال کې یو ځل پاکېدل.
غړيYou need to subscribe to view the full article. Please login or register a new account.
