<p style="text-align: justify;">کابل (پژواک، ۱۱ غویی ۱۴۰۲): د ریاستالوزرا اقتصادي معاونیت وایي، په روان لمریز کال کې به د ۱۴۶۸ کیلومتره په اوږدوالي د مزارشریف - هرات - کندهار د اوسپنې پټلۍ پروژې لومړني کارونه پیل شي.</p>
<p style="text-align: justify;">اقتصادي معاونیت نن پر خپله <strong><a href="https://twitter.com/FDPM_AFG/status/1652925968086958080">ټویټرپاڼه</a> </strong>لیکلي، اقتصادي کمېسیون تېر کال د سلواغې په ۲۹مه موظفې کمېټې ته دنده وسپارله څو د اوسپنې پټلۍ ادارې داسې ستره او ملي پروژه په ګوته کړي چې ودانیزې چارې یې له کورنیو عوایدو بشپړېدای شي.</p>
<p style="text-align: justify;">سرچینه زیاتوي، کمېسیون له یادې کمېټې سره په ګډه د پروژې مسیر، اقتصادي او جغرافیایي ارزښت او د عملي کېدو لارو چارو ته په کتو د مزارشریف – هرات – کندهار اوسپنې پټلۍ پروژه په ګوته کړه.</p>
<p style="text-align: justify;">د سرچینې د معلوماتو له مخې، دغه پروژه په دوو برخو کې پلې کېږي، چې لومړۍ یې د ۶۵۷ کیلومتره په اوږدالي له مزارشریفه تر هرات او دویمه یې د ۸۱۱ کیلومتره په اوږدوالي له هراته پیل تر فراه، نیمروز، هلمند او د کندهار تر سپین بولدک پورې ده.</p>
<p style="text-align: justify;">د ریاستالوزرا اقتصادي معاونیت لیکي چې د دې پروژې د لومړي فاز په اړه د ترسره شوو تخنیکي، اقتصادي مطالعاتو، ترانزیټ ارزښت، د اټکل شوو انتقالاتو حجم او عوایدو ته په کتو به د لومړۍ برخې عملي چارې د روان لمریز کال په اوږدو کې پیل شي.</p>
<p style="text-align: justify;">د سرچینې د څرګندونو له مخې، لومړۍ به د ۴۷ کیلومترو په اوږدوالي د خواف – هرات پروژې د څلورمې برخې د دویم فاز او دویم به د ۷۰ کیلومتره په اوږدوالي د اندخوی – شبرغان پروژې ودانیزې چارې، درېیم به له هراته تر مزار پورې د ۶۵۷ کیلومتره په اوږدوالي د ډیټېل ډیزاین چارې ترسره شي.</p>
<p style="text-align: justify;"><strong>د پروژه ګټې او موخې</strong></p>
<p style="text-align: justify;">د ریاستالوزرا اقتصادي معاونیت لیکي چې افغانستان د ایران له چابهار، بندر عباس او همدارنګه د پاکستان له کراچۍ او ګوادر بندرنو سره نښلول، د افغانستان له لارې له ایران، ترکیې او اروپایي هېوادونو سره د شرقي اسیا نښلېدل، د افغانستان له لارې له سوېلي اسیا او بحري بندرونو سره د منځنۍ اسیا او روسیې نښلېدل، منطقوي اتصال رامنځته کېدل او د افغانستان له لارې د سیمې ترانزیټ او انتقالاتو زیاتېدل او د افغانستان له لارې د مسکو او ډیلي ترمنځ تر ټولو لنډ او اقتصادي مسیر رامنځته کېدل، د یادې پروژې ګټې او موخې دي.</p>
<p style="text-align: justify;">د سرچینې معلوماتو له مخې، دغه پروژه ۱۴۶۸ کیلومتره اوږدوالی لري چې د هېواد له ۹ ولایتونو، ۳۷ ولسوالیو او ۸۰۰ کلیو څخه تېرېږي.</p>
<p style="text-align: justify;">د ریاستالوزرا اقتصادي معاونیت نه دي ویلي چې پر دې پروژه څومره لګښت راځي او کله بشپړېږي.</p>
