<p style="text-align: justify;">[restrict paid="true"]</p>
<p style="text-align: justify;">اټلانټا (پژواک، ۱۵ غویی ۱۴۰۲): د بلجیم حکومت وایي، له داعش ډلې سره د تړاو او ملاتړ په تور یې اووه کسان نیولي چې د «ترهګریز برید» دسیسه یې جوړوله.</p>
<p style="text-align: justify;">د بلجیم په پلازمېنې بروکسل کې څارنوالانو پرون په یوې اعلامیې کې ویلي، اووه واړه نیول شوي کسان چیچنیایان دي او درې یې د بلجیم تابعیت هم لري.</p>
<p style="text-align: justify;">سرچینې زیاته کړې، تر اوسه څرګنده شوې نه ده چې یادو کسانو پر کوم ځای د برید کولو پلان درلود.</p>
<p style="text-align: justify;">د راپورونو له مخې، پولیسو او ځانګړو ځواکونو یاد کسان د بلجیم په لویدیځ کې په څو بېلابېلو ځایونو کې د چاپو پر مهال نیولي دي. د عملیاتو مشري یوه قاضي کوله چې د ترهګرۍ په قضیو کې مهارت لري.</p>
<p style="text-align: justify;">د څارنوالانو په اعلامیې کې ویل شوي چې د دغو مشکوکو کسانو پرېکړه به قاضي کوي چې آيا پر هغوی د تور لګولو لپاره کافي شواهد شته که نه.</p>
<p style="text-align: justify;">په اعلامیې کې همدرانګه ویل شوي چې ترهګریز ترور، د ترهګرې ډلې په کړنو کې برخه اخیستل او ترهګریز برید لپاره چمتووالی هغه احتمالي تورونه دي چې ښایي پر یادو کسانو پورې شي.</p>
<p style="text-align: justify;">د څارنوالانو د معلوماتو له مخې، پر اووه واړو نیول شوو کسانو دا شک دی چې په بلجیم کې یې د ترهګریز برید پلان درلود او ټول یې د یوې داسې ډلې غړي دي چې د اسلامي دولت یا داعش ملاتړ کوي.</p>
<p style="text-align: justify;">د بلجیم د فدرالي څارنوالانو د دفتر یوه ویاند اریک وان دیوسي فرانس پریس خبري اژانس ته ویلي: «داسې معلومېږي چې دغو کسانو په بلجیم کې یوه اداره په نښه کړې وه او په فعاله توګه یې د وسلو لټون کاوه».</p>
<p style="text-align: justify;">د اسلامي دولت یا داعش ډلې د ۲۰۱۶ کال د مارچ میاشتې په ۲۲مې نېټې د بلجیم په پلازمېنې بروکسل کې پر هوایي ډګر او د اورګاډي پر یوه تمځای د بریدونو کولو ادعا وکړه چې ۳۲ کسان پکې وژل شوي وو او سلګونه نور ټپيان وو.</p>
<p style="text-align: justify;">له یادو بریدونو څو میاشتې وړاندې په ۲۰۱۵ کال کې هم داعش پورې اړوندې یوې شبکې د فرانسې په پاریس ښار کې څو چاودنې وکړې چې ۱۳۰ کسان پکې وژل شوي وو.</p>
<p style="text-align: justify;">داعش یا د اسلامي دولت ډلې په ۲۰۱۵ کال کې شاوخوا څلور سوه جنګیالي د دې لپاره روزلي وو چې د پاریس او بلجیم د بریدونو په څېر د اروپا په نورو ښارونو کې هم بریدونه وکړي. دغه معلومات اروپایي چارواکو د اېپي خبري اژانس ته ورکړي دي.</p>
<p style="text-align: justify;">د اروپا د پولیسو ادارو او استخباراتي مسؤلینو هم تائید کړې وه چې د اسلامي دولت یا داعش ډلې په بهرنیو هیوادونو کې د بریدونو لپاره یوه ځانګړې ډله جوړه کړې وه چې د ځانګړو عملیاتو د ځواکونو په شان بریدونه وکړي.</p>
<p style="text-align: justify;">[/restrict]</p>
