<p style="text-align: justify;">کابل (پژواک، ۲۳ غویی ۱۴۰۲): د افغانستان، پاکستان او ازبکستان اوسپنې پټلۍ پروژې د چارو مخ ته وړو په موخه تاشکند کې دفتر پرانیستل شو او په پام کې ده چې د همدې پروژې لپاره په کابل او اسلاماباد کې هم دفترونه پرانیستل شي.</p>
<p style="text-align: justify;">د افغانستان، ازبکستان او پاکستان اوسپنې پټلۍ (افغان ټرانس) – چې ۷۸۰ کیلومتره اوږدوالی لري او د افغانستان له خاورې مرکزي اسیا له سوېلي اسیا سره نښلوي - له مزارشریف څخه پیل او د جلالاباد تر تورخم ښارګوټي پورې رسېږي. د افغانستان اوسپنې پټلۍ ادارې معلوماتو له مخې، د دې پروژې لومړنۍ ساحوي سروې تېر کال په زمري میاشت کې بشپړه شوې ده.</p>
<p style="text-align: justify;">د افغانستان اوسپنې پټلۍ ادارې سرپرست ملا بختالرحمن په مشرۍ یو پلاوی د روانې غویي میاشتې په ۲۰مه له ازبکستان او پاکستان سره د یادې پروژې د تخنیکي او اقتصادي مطالعاتو په اړه د خبرو د پیل په موخه ازبکستان ته تللی و.</p>
<p style="text-align: justify;">د اوسپنې پټلۍ ادارې پر خپله <strong><a href="https://twitter.com/afghanrailway/status/1657079278490603521">ټویټرپاڼه</a> </strong>لیکلي چې ازبکستان ته د افغانستان د اوسپنې پټلۍ ادارې د پلاوي سفر په لړ کې چې مشري یې د دې ادارې عمومي رییس ملا بختالرحمن شرافت کوي، تېره ورځ (د غویي ۲۲مه) د افغانستان، پاکستان او ازبکستان د اوسپنې پټلۍ مسوولینو ترمنځ ګډه ناسته وشوه او په پایله کې یې د دې پروژې د چارو مخ ته وړلو لپاره ګډ دفتر پرانیستل شو.</p>
<p style="text-align: justify;">سرچینې لیکلي چې د دفتر پرانيستې مراسمو کې ازبکستاني چارواکو او د افغانستان او پاکستان سفیرانو هم برخه اخیستې وه.</p>
<p style="text-align: justify;">د سرچینې د معلوماتو له مخې، دغه دفتر د ازبکستان په تاشکند ښار کې موقعیت لري او د درې واړو هېوادونو استازي به په ګډه د افغان ټرانس پروژې چارې له همدغه دفتره همغږي کوي.</p>
<p style="text-align: justify;">د یادې ادارې د څرګندونو له مخې، په پام کې ده د همدې پروژې یو دفتر کابل او بل اسلاماباد کې هم فعال شي.</p>
<p style="text-align: justify;">سرچینه زیاتوي، ټاکل شوې د یادو هېوادونو د اوسپنې پټلۍ لوړرتبه چارواکو بله ناسته د روان ۲۰۲۳ زېږدیز کال په جون میاشت کې په اسلاماباد کې جوړه شي.</p>
<p style="text-align: justify;">سرچینه کاږي، د ازبکستان په ناسته کې د رېلي همکاريو پر پیاوړتیا او د حیرتان- مزارشریف اوسپنې پټلۍ له لارې د سوداګریزو توکو د لېږد رالېږد پر ډېروالي هم بحث وشو.</p>
