<p style="text-align: justify;">ګردېز (پژواک، ۲۴ غویی ۱۴۰۲): د پکتیا ولایت امنیتي مسوولین وايي، تېره شپه د دغه ولایت د ډنډ پټان ولسوالۍ په مربوطاتو کې ۷۷ میله امریکایۍ بریټا تومانچې ترلاسه شوې دي.</p>
<p style="text-align: justify;">د یاد ولایت امنيې قوماندانۍ له لوري نن پژواک خبري اژانس ته په رالېږلې خبرپاڼه کې ویل شوي: «تېره شپه امنیتي ځواکونو ۷۷ میله امریکایۍ بریټا تومانچې له قاچاقبرو څخه نیولې دي.»</p>
<p style="text-align: justify;">د سرچینې په وینا، قاچاقبر په تېښته بریالي شوي خو امنیتي ځواکونه يې د نیولو په لټه کې دي.</p>
<p style="text-align: justify;">په خبرپاڼه کې همداراز له جزئیاتو پرته ویل شوي چې دغه تومانچې د سپرلي په یوه موټر کې د تلاشۍ پر مهال ترلاسه شوې دي.</p>
<p style="text-align: justify;">د يادونې ده، شاوخوا دوه مياشتې وړاندې هم د پکتيا په مېرزکې ولسوالۍ کې دغه ډول لسګونه میله تومانچې ترلاسه شوې وې.</p>
