کابل (پژواک، ۲۴ غویی ۱۴۰۲): د افغانستان کرکټ بورډ په لومړي ځل په کابل کې یوه نندارتون کې د کرکټ ملي لوبډلې له خوا په بېلابېلو نړۍوالو سیالیو کې ګټل شوي کپونه نندارې ته وړاندې کړل.
د تېرې پنجشنبې په ورځ «د کابل نړۍوال نندارتون» کورنیو تولیداتو او محصولاتو ته د بازارموندنې، له ملي پانګهوالو ملاتړ، د سوداګرو ترمنځ اړیکو جوړولو او هېوادوالو ته د کورنیو محصولاتو او تولیداتو ورپېژندلو په موخه پرانیستل شو.
په یاد نندارتون کې نن (د غویي ۲۴مه) د کرکټ بورډ له لوري په لومړي ځل د کرکټ ملي لوبډلې له خوا په بېلابېلو نړۍوالو لوبو کې ګټل شوي کپونه نندارې ته وړاندې شول.
د کرکټ بورډ اجراییوي رییس نصیب خان پژواک خبري اژانس ته وویل، دغه کپونه یې ځکه نندارې ته وړاندې کړل چې خلک د کرکټ ملي لوبډلې لاستهراوړنې له نږدې وګوري.
نوموړی وایي: «کرکټ بورډ همیشه له خپل ادرس څخه کوښښ کړی چې د افغانستان ښه کلتور، صنعت او تولید نړۍ ته ور وپېژني.»
هغه له سوداګرو او شرکتونو غوښتنه وکړه چې د کرکټ ملي لوبډلې مالي ملاتړ دې وکړي.
همدارنګه د کرکټ ملي لوبډلې د یو ورځنیو سیالیو لوبډلمشر حشمتالله شهیدي په یاد نندارتون کې پژواک ته وویل، نن چې کوم کپونه نندارې ته وړاندې شوي دا د افغان لوبډلې لاستهراوړنې دي.
نوموړی وایي، دغه کپونه افغان لوبډلې په بېلابېلو نړۍوالو سیالیو او هېوادونو کې ګټلي دي.
شهیدي همداراز له سریلانکا سره د افغانستان د راتلونکو سیالیو په اړه د پژواک خبریال د یوې پوښتنې په ځواب کې وویل، افغان کرکټ ملي لوبډله له سریلانکا سره د راتلونکو درېیو یو ورځنیو لوبو لپاره پوره چمتووالی لري او په دغو لوبو کې به ښې لاستهراوړنې ولري.
د یادونې ده، د افغانستان کرکټ ملي لوبډله به د راتلونکې جون میاشتې په دویمه، څلورمه او اوومه نېټه له سریلانکا سره درې نړۍوالۍ یو روځنۍ لوبې ترسره کړي.
Visits: 204
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن