میدانښار (پژواک، ۲۷ غویی ۱۴۰۲): د میدان وردګو د عامې روغتیا ریاست مسوولین وایي، روانه اوونۍ د دغه ولایت په بېلابېلو سیمو کې د سترګو ناروغیو متخصصانو ټيم له خوا له ۲۰۰۰ ډېرو کسانو وړیا درملنه شوې ده.
هغوی وايي، د ډاکټرانو دغه ټیم د غویي په ۲۲مه له کابله ورغلی او لا هم هلته دی چې په نوبتي ډول بېلابېلو سیمو ته ځي.
د یاد ولایت د عامې روغتیا رئیس ډاکټر زرک ځیرک پژواک خبري اژانس ته وویل: «د سترګو د ناروغیو د متخصصانو له خوا د ولایت په کچه د سترګو له ۲۰۰۰ ډېرو ناروغانو وړیا درملنه شوې چې له دې جملې د ٢٠٠ ناروغانو سترګې عملیات شوې دي او پاتې نورو ته یې درمل ورکړل شوي دي.»
هغه وویل، د میدان وردګو د اوسېدونکو خراب اقتصادي وضعیت ته په کتو دوی هڅه کوي چې په نورو برخو کې هم متخصص ټیمونه دې ته چمتو کړي څو د دغه ولایت اوسېدونکو ته وړیا روغتیایي خدمات وړاندې وکړي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن