کلات (پژواک، ۱ غبرګولی ۱۴۰۲): د زابل د سوېلي ولسوالیو یو شمېر اوسېدونکو نن په دغه ولایت کې د قبایلو او سرحدونو چارو له سرپرست وزیر څخه غوښتنه وکړه چې د شملزو ګمرک جوړولو چارې دې ژر پيل او بشپړې شي.
د یادونې ده، د قبایلو او سرحدونو چارو وزارت سرپرست مولوي نورالله نوري نن د یوه پلاوي په مشرۍ یاد ولایت ته تللی او په شینکۍ ولسوالۍ کې يې له چارواکو او قومي مشرانو سره ولیدل.
د زابل د شینکۍ، سیوري، اټغر او نوبهار ولسوالیو اوسېدونکو له د قبایلو چارو له سرپرست وزیر څخه وغوښتل چې د وزیرانو شورا د شملزو ګمرک منظور کړی او باید د جوړولو چارې يې ژر پيل او بشپړې شي.
د زابل د شینکۍ ولسوالۍ یوه قومي مشر محمداکبر جان وویل: «د شملزو ولسوالۍ ګمرک منظور شوی خو کارونه يې نه دي پيل شوي، هیله لرو چې حکومت د دغه ګمرک او ورته د ورغلې لارې د جوړېدو کارونه ژر پيل کړي.»
هغه زیاته کړه، د یادې ولسوالۍ لاره له ډېرو کلونو راهیسې خامه ده چې له امله یې خلک له ګڼو ستونزو سره مخ دي.
د اټغر ولسوالۍ قومي مشر حاجي عبدالله وویل: «موږ د اسلامي نظام قايمېدو لپاره قربانۍ ورکړې او اوس د نظام لپاره په کار ده چې زموږ ستونزو ته پاملرنه وکړي او حللاره دې ورته ولټوي.»
نوموړي هم غوښتنه وکړه چې حکومت باید د نورو ټولنیزو ستونزو د حل ترڅنګ، د شملزو ولسوالۍ ګمرک فعال کړي.
د زابل مرستیال والي مولوي محبالله حماس وویل، حکومت د ټولو ولسوالیو متوازنې پراختیا ته ژمن دی او هڅه کوي چې د ولسونو د ستونزو حل ته پاملرنه وکړي.
د سرحدونو او قبایلو چارو وزارت سرپرست مولوي نورالله نوري ژمنه وکړه چې د خلکو ستونزې به له کابينې او لوړپوړو چارواکو سره شریکوي او حللارې به ورته لټوي.
هغه وویل، ولس د ستونزو هوارول د دوی وجیبه ده او حللارې به ورته پیدا کوي.
Visits: 60
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن