کابل (پژواک، ۶ غبرګولی ۱۴۰۲): د بهرنيو چارو وزارت وايي، پاکستان ته د افغانانو د تګ راتګ په برخه کې د اسانتياوو برابرولو لپاره د دواړو هېوادونو ترمنځ د يوې ګډې کمېټې پر جوړېدو هوکړه وشوه.
د بهرنیو چارو وزارت ویاند مرستیال حافظ ضیاءاحمد تکل پر خپله ټویټرپاڼه لیکلي چې نن (شنبه) د بهرنیو چارو وزارت سرپرست مولوي امیرخان متقي په کابل کې د پاکستان له شارژدافیر عبیدالرحمن نظاماني سره وکتل.
سرچینې لیکلي، په دې کتنه کې پاکستان ته د بهرنیو چارو وزارت سرپرست په مشرۍ د سیاسي او تجارتي پلاوي ترسره شوی سفر مثبت وبلل شو.
سرچینې زیاته کړې، د دوه اړخیزو سیاسي او اقتصادي همکاریو د ودې په باب تعقیبي یادونې وشوې.
سرچینه زیاتوي، د متقي له غوښتنې او ټینګار سره سم په دې ناسته کې د هېوادوالو د تګ راتګ په برخه کې د اسانتیاوو برابرولو لپاره د پاکستان سفارت او د بهرنیو چارو وزارت د قونسلي ریاست د یوې ګډې کمېټې پر جوړېدو هوکړه وشوه.
سرچینه کاږي، په دې ناسته کې په ځانګړې توګه د لارو په اوږدو کې د اسانتیاوو په راوستو او د تګ راتګ په برخه کې د خدماتو د وخت پر زیاتېدو خبرې وشوې.
سرچینې څرګنده کړې، نظاماني د هغو پاکستاني محصلینو لپاره چې افغانستان ته د زدهکړو په موخه راځي، د ویزو د وخت ډېرولو غوښتنه وکړه چې په اړه یې د تسهیل ډاډ ورکړل شو.
د سرچینې د معلوماتو له مخې، د ناستې په پای کې د دواړو هېوادونو ترمنځ پر ګڼو نورو دوه اړخیزو مواردو خبرې وشوې او د متقابلو اغېزناکو همکاریو په دوام ټینګار وشو.
غړيYou need to subscribe to view the full article. Please login or register a new account.
