پروان کې یو کس وژل شوی او درې نور ټپیان دي

<p style="text-align: justify;">چاریکار (پژواک، ۲۷ غبرګولی ۱۴۰۲): د پروان امنيتي مسوولین وايي، د دغه ولایت په بګرام ولسوالۍ کې نامعلومو وسله‌والو یو کس وژلی او په سیدخېلو ولسوالۍ کې یوه کس درې نور ټپیان کړي دي.</p>

<p style="text-align: justify;">د پروان امنيې قوماندانۍ ویاند محمدکامران زيد پژواک خبري اژانس ته وویل، د بګرام ولسوالۍ يو اوسېدونکی سیف‌الرحمن -چې په اصل کې د همدې ولسوالۍ د قلعه‌خواجه سيمې اوسېدونکی و او اوسمهال يې فرقې ته څېرمه ژوند کاوه- تېره شپه شاوخوا اته بجې په ډزو وژل شوی دی.</p>

<p style="text-align: justify;">هغه زياته کړه، ياد کس رواني ناروغي لرله او څه موده مخکې يې خپل ورور وژلی و.</p>

<p style="text-align: justify;">د زید په وینا، د یادې پېښې په تړاو تر دې مهاله څوک نه دي نیول شوي، خو پلټنې روانې دي.</p>

<p style="text-align: justify;">د امنيې قوماندانۍ ویاند همداراز وايي، د پروان د سیدخېلو ولسوالۍ د خدای‌دادخېلو سيمې يوه اوسېدونکي نويد د همدې سيمې درې اوسېدونکي خالد، سیداغا او بابا د چره‌ييز ټوپک په وسیله ویشتلي او ټپيان کړي دي.</p>

<p style="text-align: justify;">د هغه په خبره، ټپیان د سيمې د اوسېدونکو او مسوولینو له خوا د ولايت ملکي روغتون ته لېږدول شوي دي.</p>

<p style="text-align: justify;">نوموړي وویل، په دې تړاو د پېښې عامل نويد نیول شوی او تر څېړنو وروسته به اړوند ارګان ته وسپارل شي.</p>