ځايي خلک: حکومت دې د کونړ سیند د استنادي دېوال نیمګړې چارې بشپړې کړي

اسعداباد (پژواک، ۳۰ غبرګولی ۱۴۰۲): د کونړ یو شمېر اوسېدونکي له حکومته غواړي چې د دغه ولایت د سیند دواړو غاړو ته د استنادي دېوال پروژې پاتې چارې دې بشپړې کړي.

د یاد ولایت د سرکاڼو ولسوالۍ اوسېدونکي ملک خان‌باچا پژواک خبري اژانس ته وویل، د کونړ سیند دواړو غواړو ته د استنادي دېوال کارونه چټک شوي خو بشپړ شوي نه دي.

هغه زیاته کړه: «د تېر حکومت پر مهال د سیند د مهارولو لپاره د سیند دواړو غاړو ته د بولډروال د جوړېدو ډېره برخه کارونه ترسره شوي، خو لاهم د پاتې نیمګړو چارو د نه بشپړېدو له امله ځمکې او کورونه له خطر سره مخ دي.»

هغه وايي، دا ډېره مهمه پروژه ده او اوسنی حکومت باید د خلکو د کرنیزو ځمکو او کورونو د ژغورلو لپاره د یادې پروژې پاتې کارونه بشپړ کړي.

د خاص کونړ ولسوالۍ اوسېدونکی او قومي مشر محمدګلاب وايي: «د تېر جمهوري نظام پر مهال کونړ کې یوه تر ټولو بنسټیزه پروژه چې د خلکو ډېرې هیلې ورپورې تړل شوې وې، د بولډروال جوړول و چې هغه چارې یې بشپړې نه شوې او په نیمه کې پاتې شوې.»

نوموړي هم له حکومته وغوښتل چې د یادې پروژې پاتې کارونه دې بشپړ کړي، څو په وینا يې، د خلکو سر او مال د اوبو له خطره وژغورل شي.

بلخوا، د یاد ولایت د کلیو پراختیا او بیارغونې ریاست مسوولین هم مني چې د کونړ سیند دواړو غواړو ته د ډبرو دېوال (بولډروال) پروژې کارونه شاوخوا ۶۵ سلنه بشپړ شوي او د پاتې چارو بشپړولو لپاره يې هڅې روانې دي.

د یاد ریاست د ساختماني چارو مدیر انجنیر عبدالفتاح وویل: «څه د پاسه یو میلیارد افغانیو په لګښت د تېر جمهوري نظام پر مهال د کونړ په پنځو ولسوالیو کې د کلیو بیارغونې او پراختیا وزارت په مالي لګښت د سیند اوبو د مهارولو په موخه د بولډروال پروژه پېل شوې وه چې د نظام له سقوط وروسته یې چارې نیمګړې پاتې دي.»

هغه زیاته کړه چې یاد دېوال ۵۰ کیلومټره اږدوالی لري چې په جوړېدو سره به يې زرګونه هکټاره کرنیزه ځمکه او د خلکو کورونه د اوبو له خطره وژغورل شي.

هغه وايي، له مرکزي حکومت سره يې د دغه دېوال د پاتې کارونو د بشپړېدو موضوع مطرح کړې او هیله ده چې ژر اقدام وشي.

د یادونې ده، کونړ سیند د هېواد له مهمو سیندونو څخه دی چې د اوبو ډېره برخه يې له هېواده بهر ځي او ډېر کله د اوبو کچې لوړېدو له امله د ځايي خلکو کرنیزې ځمکې او کورونه له ګواښ سره مخ وي.