د ا.ا مشر مسوولینو ته: له خلکو سره داسې چلند مه کوئ چې هغوی ځان پردی وبولي

کابل (پژواک، ۲ چنګاښ ۱۴۰۲): د اسلامي امارت مشر په خپل اختریز پیغام کې ویلي، مسوولین دې د خلکو پر وړاندې دروازې پرانیزي او له هغوی سره دې داسې چلند نه کوي چې ځان له مسؤولینو کم او یا پردی وبولي.

هغه دغه راز زیاته کړې، اسلامي امارت د نورو په چارو کې لاسوهنه نه کوي او نورو ته هم اجازه نه ورکوي چې د افغانستان په کورنیو چارو کې مداخله وکړي.

د اسلامي امارت مشر مولوي هبة‌الله اخندزاده دغه څرګندونې د لوی اختر په مناسبت په یوه پیغام کې کړې دي.

په پیغام کې راغلي: «له ټولو امنیتي مسوولینو غواړو چې د اختر په ورځو کې د ولس هوساینې، خدمت او خوندیتوب ته پام وکړي، د هېوادوالو د خوشحالۍ او ارامۍ لپاره ټول لازم اقدامات ترسره کړي، د شهیدانو، معلولينو او يتیمانو د کورنیو پوښتنه وکړئ او د خپل توان په اندازه ورسره مرسته ورسره وکړي.»

هغه وايي: «ټولو مسوولینو ته مې توصیه دا ده چې د حکومتدارۍ په ټولو برخو کې د مؤمن ولس د خدمت، امنیت او هوساینې لپاره خپل مکلفیتونه په جدیت سره تعقیب کړئ، خپلې دروازې د ولس پر مخ خلاصې کړئ، کارونه یې په احسنه او عاجله طریقه اجراء کړئ، له خلکو سره هیڅکله داسې چلند مه کوئ چې ولس ځان له مسوولینو کم او یا پردی وبولي.»

هغه زیاته کړې چې اسلامي امارت د ټولې نړۍ، په ځانګړي توګه له اسلامي هېوادونو سره ښې او رغنده سياسي او اقتصادي اړیکې غواړي.

هغه زیاتوي: «لکه څرنګه چې موږ د نورو هېوادونو په کورنیو چارو کې لاسوهنه نه کوو، همدا ډول نورو ته هم اجازه نه ورکوو چې په هيڅ بهانه او عنوان زموږ په کورنیو مسایلو کې مداخله ولري او یا موږ ته لارښوونې وکړي.»

د هغه په وینا، حرمینو شریفینو ته د نړۍ له ګوټ ګوټ څخه راغلو حجاجو څخه غوښتنه کوي چې د ټول اسلامي امت، په ځانګړي ډول د افغانستان ځورېدلي ولس او هېواد لپاره دعاءګانې وکړي، څو یې الله تعالی له دنیوي او اخروي سعادت او سرلوړۍ څخه برخمن کړي.

هغه د فلسطين له مېرمنو، ماشومانو او عامو بې دفاع مسلمانانو سره د اسرائيلو ظلمونه پر کلکو ټکو غندلي او له نورو هېوادونو یې غوښتي چې د دغه ستر بشري جنايت او وحشي مظالمو مخنيوي په برابر خپل مکلفيت ادا کړي.

دی زیاتوي: «د اسلامي امت د ټولو ستونزو او ناخوالو حل په يووالي کې دی، له دې امله د سوډان اسلامي هېواد له خلکو او حکومت څخه مو دا غوښتنه ده چې خپلمنځي اختلافات او جنګونه ترک کړي او د يووالي، امنيت او ورورګلوۍ لپاره په ګډه کار وکړي.»

د یاد پیغام له مخې، اوس د افغانستان خپلواکي تأمین شوې، یووالی ټینګ شوی، تعصبات له منځه وړل شوي، د  هېواد ارضي تمامیت حفظ شوی، د هېواد ملي شتمني لکه ګمرګي او مالیاتي عواید، کانونه، امارتي ځمکې، ځنګلونه او نورو ملکیتونه - چې د ملت مشترک مال دی- د شخصي استفاده کوونکو او زورواکو له لاسه ایستل شوي او د بیت المال د شتمنیو په حیث خوندي شوي.

مولوي هبة‌الله اخندزاده وايي: «د اسلامي امارت له حاکمیت سره د ښځو شرعي حقونه تأمین شوي او د ښځو د بې حجابۍ او ګمراهۍ په اړه تېر منفي تاثیرات د ختمېدو په حال کې دي؛ په هېواد کې دیني احکام، شرعي اوامر، حدود او قصاص چې د عملي اجراء امکانات یې نه وو، اوس اجراء کېږي.»

هغه زیاته کړې، په اقتصادي برخه کې ټول هغه اټکلونه چې دلته یې د بشپړ اقتصادي سقوط او سراسري بحران وړاندوینه کېده، غلط ثابت شوي دي.

د زیاتوي: «په نږدې تاریخ کې په لومړي ځل هېواد په اقتصادي لحاظ خودکفا شوی او د بیارغونې، زراعت، ابیارۍ، سړک‌سازۍ، معادنونو د استخراج او نورو برخو کې مهم ترتيبونه پيل او تر لاس لاندې نيول شوي دي.»

هغه ویلي، اسلامي امارت پر ټولو پانګوالو او ملي تجارانو غږ کوي چې په بېلابېلو برخو کې پانګونې وکړي او د هېواد پرمختګ کې خپل مکلفیتونه اداء کړي، اسلامي امارت د دوی امنیت او د ټولو حقوقو رعایت ته ژمن دی او لازم سهولتونه ورته برابروي.

دی وايي: «ټول هغه کسان چې امن ته ګواښ پېښوي، له هغوی څخه غوښتنه دا ده چې نور په خپل هېواد کې له خپلو هېوادوالو سره د سوکالۍ ژوند پیل کړي، په امن او ثبات کې مرسته وکړي، د پردیو د ګټو لپاره دې راغلی امن نه متضرر کوي.»

د هغه په وینا، د اسلامي امارت اقداماتو له امله د مخدره موادو کرکيله د نشت برابر شوې او پر هېوادوالو غږ کوي چې د اسلامي لارښوونو له مخې، د نړۍوالو له تطميع او همکارۍ پرته بديل معيشت ته مخه کړي.