جلالاباد (پژواک، ۲۹ چنګاښ ۱۴۰۲): په ننګرهار ولايت کې امنيتي مسوولين وايي، په جلالاباد ښار او کوز کونړ ولسوالۍ کې د درېيو ترافيکي پېښو له امله د دوو ماشومانو په ګډون درې کسان مړه شوي دي.
د ننګرهار ولايت د امنيې قوماندانۍ وياند عبدالبصير زابلي د چنګاښ په ۲۹مه پژواک اژانس ته وويل، د جلالاباد ښار د لومړۍ او نهمې امنيتي حوزو په مربوطاتو کې په دوو جلا ترافيکي پېښو کې دوه ماشومان مړه شوي دي.
هغه زياته کړه، د لومړۍ امنيتي حوزې اړوند سيمه کې يوې بې پلیټه اشترنګي ريکشا یو بایسکل چلوونکی وهلی چې بایسکل چلوونکی ځای پر ځای مړ شوی او ريکشاچلوونکی د پېښې له ځایه تښتېدلی دی.
هغه زياته کړه، بله ترافیکي پېښه د نهمې امنيتي حوزې اړوند د ثمرخېلو په ساحه کې د الټو او ویډز موټرونو ترمنځ شوې چې الټو موټر کې ناست يو ماشوم په کې مړ شوی او دواړه موټرچلوونکي تښتېدلي دي.
د امنیې قوماندانۍ وياند وايي، د کوز کونړ ولسوالۍ په کوټه تاران سیمه کې هم یو فيلډر ډوله موټر چې جلالاباد ښار ته پر لار و، د تیزچلونې له امله چپه شوی او موټرچلوونکی په کې مړ شوی دی.
