نورستان کې زرګونو کسانو ته په عام‌المنفعه پروژو کې د کار زمینه برابره شوې ده

پارون (پژواک، ۲۹ زمری ۱۴۰۱): د نورستان سیمه‌ییز مسوولین وایي چې د ملګرو ملتونو د خوړو او کرنې ادارې لخوا د دغه ولایت په کامدېش او برګمتال ولسوالیو کې له ۷ زرو ډېرو کسانو ته د کار زمینه برابره شوې ده.

د نورستان د کرنې، اوبولګولو او مالدارۍ ریيس مولوى سلمان ايمن پژواک خبري اژانس ته وویل چې ياد کسان به په خپلو کليو کې د ویالو، چيک ډيمونو او د اوبو د ذخيرو جوړولو په برخه کې کار کوي.

ده زیاته کړه، چې په دغو عام‌المنفعه پروژو کې به ۷۴۴۰ کسان پر کار بوخت شي چې هر کارګر ته به د شل ورځې کار په بدل کې سل امريکايې ډالر ورکول کيږي.

د ده په خبره، د دغو پروژو په پلي کېدو سره به په کامدېش او برګمتال ولسواليو کې زرګونه جريبه کرنيزه ځمکه هم خړوبه او بزګرانو ته به د اوبه خور په برخه کې اسانتياوې رامنځته شي.

د مسوولینو په وینا، ياد پروګرام د نورستان ولایت د کرنې، اوبولګولو او مالدارۍ  ریاست سره په همغږۍ د ملګرو ملتونو د خوړو او کرنې ادارې په مالی لګښت د افغانستان راتلونکي نسلونو موسسې په تخنیکی مرسته پيل شوی او د پنځو مياشتو په موده کې به بشپړ شي.

د کامدېش ولسوالۍ يو کروندګر نوراکبر وايي، خوښ دی چې دغه ډول پروژه د دوى په کليو کې پلې کيږي او د کار او مزد ترڅنګ به د دوى ځمکې هم خړوبه شي.

د برګمتال ولسوالۍ يو کروند ګل زمان بيا د کار په بدل کې د مرستو وېشل ګټور ګام بولي او زياتوي چې په دغه کار سره به حق حقدار ته سپارل کېږي.