د اته میلیون افغانیو په لګښت د هرات د تیاتر ودانۍ جوړولو چارې پیل شوې

هرات (پژواک، ۴ وږی ۱۴۰۲): هرات کې ځایي سرچینې وایي چې د اته میلیون افغانیو په لګښت د دغه ولایت د تیاتر ودانۍ جوړولو چارې پیل شوې.

د هرات د اطلاعاتو او فرهنګ رییس مولانا نعیم‌الحق حقاني پژواک خبري اژانس ته وویل، د دغه ولایت د تیاتر ودانۍ جوړولو چارې د ښاروالۍ له لوري په همغه پخواني موقعیت کې پیل شوې دي.

هغه د ښاروالۍ له دغه اقدامه هر کلی وکړ او ویې ویل د دې ودانۍ په جوړولو سره به د هنرمندانو لپاره یوه اتحادیه هم جوړه شي او ټول هنرمندان به د هغې تر چتر لاندې فعالیت ولري.

هغه دغه راز وویل، د هرات د تیاتر ودانۍ په جوړېدو سره به د هنرمندانو د نندارتونونو لپاره د ځای نشتوالي له امله شته ستونزې هم حل شي.

بلخوا د هرات د تیاتر هنرمندان د ځایي ادارې له دغه اقدامه خوښ دي.

د هرات یوه هنرمند غلام رسول پویا پژواک ته وویل، له دوو کلونو راهیسې د هرات تیاتر ته د نه پاملرنې له امله د دغه ولایت د هنرمندانو اندېښنې ډېرې شوې وې.

د هغه په خبره، د دې ودانۍ د کار پیلېدو د یاد ولایت د هنرمندانو هیلې زیاتې کړي، دا د هنرمندانو دنده ده چې د خپل هنر له لارې د ټولنې لاسته راوړنې او ستونزې مسوولینو ته ورسوي.

هغوی وایي، د هرات تیاتر له څه باندې یوې پېړۍ فعالیت سره، په دوو وروستیو کلونو کې له ستونزو سره لاس او ګریوان و او هیله ده چې د یادې ودانۍ په جوړېدو سره دغه ولایت کې د تیاتر ستونزې حل شي.

دغه راز د هرات ښاروالۍ ویاند ناصر ارمل پژواک ته وویل، د دغه ولایت د تیاتر ودانۍ د ښاروالۍ او د اطلاعاتو او فرهنګ ریاستونو ترمنځ په تفاهم د اته میلیون افغانیو په لګښت په درېیو پوړونو کې په اساسي ډول جوړېږي.

هغه زیاته کړه چې د دې ودانۍ لګښت د ښارولۍ له لوري ورکول کېږي.

غړي

You need to subscribe to view the full article. Please login or register a new account.