[restrict paid="true"]
<p style="text-align: justify;">اټلانټا (پژواک، ۸ وږی ۱۴۰۲): د افغانستان په ګډون د یوه ورځني کرکټ اسیایي جام سیالۍ نن پیلېږي.</p>
<p style="text-align: justify;">د کرکټ د اسیایي شورا د معلوماتو له مخې؛ ددې سیالیو څلور لوبې په پاکستان او پاتې نور یې په سریلانکا کې ترسره کېږي.</p>
<p style="text-align: justify;"><strong>عمومي معلومات:</strong></p>
<p style="text-align: justify;">ټاکل شوې وه، چې د کرکټ اسیایي جام سیالۍ د پاکستان په کوربه توب ترسره شي، خو د هندوستان تر دې پرېکړې وروسته چې پاکستان ته نه ځي؛ اسیایي شورا ځینې لوبې په سریلانکا کې د کولو اعلان وکړ.</p>
<p style="text-align: justify;">دا سیالۍ چې نن د وږي په اتمه د چهارشنبې په ورځ پیلېږيو پکې، افغانستان، پاکستان، هندوستان، سریلانکا، بنګله دېش او د نیپال لوبدلې اخلي.</p>
<p style="text-align: justify;">دغه هېوادونه په دوو ګروپونو وېشل شوې دي، پاکستان، هند او نیپال په الف ګروپ ، افغانستان بنګله دېش او سریلانکا په ب ګروپ کې دي.</p>
<p style="text-align: justify;">د کرکټ د اسیایي شورا د معلوماتو له مخې، د هر ګروپ دوه غوره لوبډلې دویمې مرحلې یا سیمي فاینل ته ځي او بیا له دوی څخه دوه لوبډلې پای لوبې ته لاره پیدا کوي.</p>
<p style="text-align: justify;">دا د روانې اګسټ میاشتې په ۳۰مه پیلېږي او د سپټمبر تر ۱۷مې نېټې پورې به دوام ولري. لومړۍ لوبه نن د پاکستان او نیپال ترمنځ ترسره کیږي.</p>
<p style="text-align: justify;">د افغانستان لومړۍ لوبه د راروانې یکشنبې په ورځ له بنګله دېش او دویمه لوبه یې د سه شنبې په ورځ له سري لانکا سره ده. دواړه لوبې یې په لاهور کې دي.</p>
<p style="text-align: justify;"><strong>افغان لوبډله:</strong></p>
<p style="text-align: justify;">د افغانستان کرکټ بورډ اسیایي سیالیو لپاره لوبډله اعلان کړې ده، ډیری پکې هغه لوبغاړي شامل دي چې څو ورځې مخکې د پاکستان پر وړاندې سیالیو کې یې برخه اخیستې وه.</p>
<p style="text-align: justify;">په ملي لوبډله کې حشمت شهیدي لوبډلمشر، رحمنالله ګربز، ابراهیم ځدراڼ، ریاض حسن، رحمت شاه، نجیبالله ځدراڼ، محمدنبي، اکرام عليخېل، کریم جنت، ګلبدین نایب، راشدخان، مجیب ځدراڼ، نوراحمد لکڼوال، شرفالدین اشرف، فضلالحق فاروقي، عبدالرحمن او سلیم ساپی شامل دي.</p>
<p style="text-align: justify;">کریم جنت او نور احمد لکڼوال د پاکستان پر وړاندې سیالیو کې برخه نه وو اخیستي ، خو د اسیایي جام لپاره اعلان شوې لوبډله کې شتون لري.</p>
<p style="text-align: justify;">د افغانستان د کرکټ مسئولین هیله لري چې افغان لوبډله به په دغو سیالیو کې ښه ځلېږي او د دوی په خبره دغو سیالیو لپاره یې ښه چمتوالی نیولی دی.</p>
<p style="text-align: justify;">د لوبغاړو د غوراوي کمېټې مشر اسدالله خان پرون پژواک اژانس سره په یوه ځانګړې مرکه کې هیله وښوده چې لوبډله دویم پړاو ته لاره ومومي.<img class=" wp-image-559853 alignleft" src="https://pajhwok.com/wp-content/uploads/2023/08/371127640_745854644013717_449301122993211346_n-300x169.jpg" alt="" width="467" height="263" /></p>
<p style="text-align: justify;">هغه زیاته کړه: "زموږ لوبغاړي ددې وړتیا لري، چې له بنګله دېش او سریلانکا څخه لوبې وګټي او تر دې مخکې یې هم هغوی ته ماتې ورکړې دي.."</p>
<p style="text-align: justify;">اسدالله خان وایي، چې دوی له اسیایي جام سیالیو مخکې له سریلانکا، بنګله دېش او پاکستان سره سیریزونه کړي او دې جام لپاره یې ښه چمتووالی نیولی دی.</p>
<p style="text-align: justify;">نوموړي د لوبغاړو د انتخاب د څرنګوالي په اړه وویل چې دوی د سیالیو څرنګوالی، د لوبغاړو وړتیا او فټنس ته په کتلو لوبډله ټاکلې ده.</p>
<p style="text-align: justify;">د هغه په وینا، د زخمي کېدو په صورت کې د هر لوبغاړي د ځای ناستي لپاره نور غوره لوبغاړي ټاکل شوې دي.</p>
<p style="text-align: justify;">د کرکټ نړۍوالې شورا په یوه راپور کې ویلي چې د اسیایي جام سیالیو کې به له شپږو هېوادونو څخه پر شپږو لوبغاړو ډیر تکیه کېږي چې دوی به ښه وځلېږي.</p>
<p style="text-align: justify;">سرچینې زیاته کړې چې په دې لوبغاړو کې افغان ستوری راشد خان، له پاکستان څخه بابر اعظم، له هندوستان څخه جسپریت بومرا، له نیپال څخه ګلشان جا، له بنګله دېش څخه تسکین احمد او له سریلانکا څخه مهیش تیکشانا شامل دي.</p>
<p style="text-align: justify;">د کرکټ اسیایي جام سیالۍ په ۱۹۸۴ زیږدیز کال کې پیل شوې، چې دغه جام اووه ځله هند، شپږ ځله سريلانکا او دوه ځله پاکستان ګټلی دی.</p>
[/restrict]
