پلخمري (پژواک، ۱۱ وږی ۱۴۰۲): بغلان کې د پلخمري نساجي فابریکه چې د تخنیکي ستونزو له امله یې له تېرو ۱۲ کالو راهیسې فعالیت ځنډېدلی و، نن يې د بیا فعالولو چارې پیل شوې.
د افغان نساجۍ فابریکو عمومي رییس عبدالمتین مزمل چې د پلخمري نساجۍ فابریکې د بیا فعالولو د چارو پرانیستلو لپاره بغلان ته راغلی و، رسنیو ته وویل، د پلخمري نساجي فابریکه چې د هېواد یوه پېژندل شوې فابریکه ده حکومت یې د بیا فعالولو چارې پيل کړې دي.
هغه وویل: «غواړو دغه فابریکه چې یو وخت په کې زرګونو کسانو کار کاوه او د هېوادوالو د ټوکر یوې برخې اړتیا یې پوره کوله، بیا فعاله کړو.»
هغه زیاته کړه: «د دې فابریکې پر دا ځل فعالېدو به لومړی د هېواد د نظامي ځواکونو جامو ټوکر اړتیا پوره شي او ورپسې د نوو ماشینونو په فعالولو چې نن مو دې فابریکې ته وسپارل زموږ د عامو کاریدونکو جامو ټوکر هم تولید شي.»
هغه وايي، په دې فابریکه کې به زرګونو کسانو ته د کار زمینه هم برابره شي.
دغه راز د پلخمري نساجي فابریکې د تخنیکي چارو مسوول عبدالمتین حمیدي وایي، د ځینو ماشینونو د بېرته فعالولو چارې پيل شوې او ځیني تر کار لاندې دي او په نږدې راتلونکې کې به دغه فابریکه د ټوکر تولید پیل کړي.
هغه وايي، اوسمهال فابریکې تولید ته د چمتو کولو په موخه ۲۰۰ کسان پر کار بوخت دي.
هغه زیاته کړه چې د ټولو ماشینونو د فعالېدو په صورت کې به په دې فابریکه کې شاوخوا ۸۰۰۰ کسانو ته د کار زمینه برابره شي.
بلخوا یو شمېر هېوادوال د حکومت د دغه اقدام ستاینه کوي، خو وايي لا زیاتې تولیدي فابریکې دې فعال شي څو خلک د کار لپاره بهر تګ ته اړ نشي.
د امان الله په نوم یو کس وايي، خوښ دی چې د پلخمري نساجۍ فابریکې د بیا فعالولو کار پیل شوی او یو شمېر هېوادوالو ته پکې د کار زمینه برابره شوې ده.
نوموړی له حکومته غواړي چې په هېواد کې لا زیاتې تولیدي فابریکې فعالې کړي څو ځوانان نورو هېوادونو ته تګ ته اړ نشي.
د پلخمري نساجي فابریکه په ۱۳۲۱ لمریز کال کې فعاله شوې او د ۱۳۹۰ کال وروستیو کې یې فعالیت په ټپه ودرېد چې له امله یې زرګونه کارګرو خپلې دندې له لاسه ورکړې.
غړيYou need to subscribe to view the full article. Please login or register a new account.










