<p style="text-align: justify;">کابل (پژواک، ۱۵ وږی ۱۴۰۲): د غرني ګروپ شرکتونو مشر وايي، په افغانستان کې د کاروبار ډېرېدو لپاره له هغو افغانانو سره د هوکړې له مخې پانګونه کوي چې د کار طرحې او نوښتونه لري خو پیسې ورسره نشته.</p>
<p style="text-align: justify;">د چارو یو شنونکی دغه کار ستایي خو وایي، دا به هغه وخت لا ښه ګټور ثابت شي چې د کاروبار په اړه د افغانانو نظرونه او طرحې د یوې با اعتباره ادارې په شتون کې ټول کړي او کار پرې وشي.</p>
<p style="text-align: justify;">د غرني ګروپ شرکتونو مشر احمدیار غرني نن پژواک خبري اژانس ته وویل: «د افغانانو هڅونې په موخه او په هېواد کې د کاروبار زیاتېدو لپاره غواړم په کور دننه او بهر افغانانو ته د وړو او متوسطو کاروبارونو لپاره له پلان سره سمه پانګه ورکړم؛ هغو ته چې ګران هېواد د بیارغونې او ابادۍ رښتینی فکر لري خو مالي او مادي ستونزې یې نه پرېږدي چې دوی خپل فکرونه پر عمل بدل کړي.»</p>
<p style="text-align: justify;">دی وايي، هر څوک کولی شي د خپل راتلونکي کاروبار په اړه «مستدللې طرحې، نوښتونه او اختراعات» له کاري پلانونو سره له یاد شرکت سره شریک کړي څو د دغه شرکت یوه ځانګړې کمېته یې وارزوي.</p>
<p style="text-align: justify;">دی وایي، هغه کسان خبرو اترو ته بلل کېږي چې یاده کمېټه یې طرحې ومني او دی د دواړو اړخونو له هوکړې سره سم له ټاکل شوي شخص سره د پانګونې برخه کې مرسته کوي او د کاروبار ګټه او تاوان به د دواړو لورو ترمنځ شریک وي.</p>
<p style="text-align: justify;">غرنی زیاتوي: «موږ ته د ښه کاروبار طرحه مهمه ده، که هغه په هره برخه کې وي خو چې د افغانستان له شرایطو سره مناسب وي او د پلې کېدو وړ وي، موږ یې پلي کوو.»</p>
<p style="text-align: justify;">ده وویل، له دې وروسته دې هیڅ افغان دا اندېښنه نه لري چې ګواکې د کاروبار طرحه او نظر لري خو پیسې نه لري؛ هغه زیاتوي: «دوی دې راوړاندې شي، پیسې موږ ورکوو خو چې کار وکړي.»</p>
<p style="text-align: justify;">د اقتصادي چارو شنونکي عبدالوافي نایبزي په دې اړه پژواک خبري اژانس ته وویل: «دا خو ډېره ښه خبره ده چې یو څوک رامخکې کېږي او نورو ته د پانګونې خبرې او مرسته کوي نو دا د قدرداني وړ ده.»</p>
<p style="text-align: justify;">دی وايي، هغه کسان چې فکر ولري او مالي امکانات ورسره نه وي نو ماتیږي او خپلو هیلو ته نه شي رسېدلی خو اوس دا یو ښه فرصت دی چې دغه کسان ترې استفاده وکړي او ځان خپلو هیلو ته ورسوي.</p>
<p style="text-align: justify;">هغه زیاته کړه، دغه پانګهوال هغو کسانو ته لبیک وايي چې وايي، فکر لري خو پانګه نه لري.</p>
<p style="text-align: justify;">خو د ده په اند، دغه کار به هغه وخت لا ښه ګټور ثابت شي چې د افغانانو نظرونه د یوې با اعتباره ادارې په شتون کې ټول کړي او کار پرې وشي.</p>
