د پښتون ژغورنې غورځنګ پلویانو هاګ نړۍوالې محکمې مخې ته په لوڅو پښو لاریون وکړ

اتلانټا (پژواک، ۱۷ وږی ۱۴۰۲): د پښتون ژغورنې غورځنګ فعالان د جرمونو تر نړۍوالې محکمې لس کیلومتره په لوڅو پښو ولاړل او د محکمې مسوولینو ته یې د پاکستان پر خلاف خپل پرېکړه‌لیک وسپاره.

د پښتون ژغورنې غورځنګ د اروپا څانګې له خوا د وږي په ۱۶مه، په یوه خبرپاڼه کې راغلي چې په ايټاليا، فرانسې، بلجيم او جرمني د غورځنګ غړو د هالنډ په کوربتوب د پنج‌شنبې په ورځ دغه لاریون پر لاره اچولی و.

سرچینې زیاته کړې چې په دغه اعتراضیه لاریون کې ګڼ شمېر مېرمنو، نارینه‌وو او ماشومانو برخه اخیستې وه.

سرچینه وایي، د لاریون‌کوونکو د هالنډ په دنهاخ ښار کې لس کیلومتره پلي په لوڅو پښو د جرمونو تر نړۍوالې محکمې ولاړل.

په خبرپاڼه کې راغلي، د لاریون ګډونوال د جرمونو نړۍوالې محکمې مخې ته راټول شول او د پاکستان د پوځ د هغو مشرانو او افسرانو د محاکمې غوښتنه یې وکړه چې د دوی په وینا د پښتنو د وینو په بهولو کې لاس لري او پر جنګي جرمونو تورن دي.

هغوی په پای کې یو پرېکړه‌لیک هم د هاګ محکمې مسوولینو ته وسپاره چې په کې د پاکستان پر پوځ او جنرالانو د بندیزونو لګولو غوښتنه شوې ده.

د لاریون ګډونوالو ویل چې د پاکستان پوځ په زندان کې د غورځنګ له مخکښو غړو لکه: علي وزیر، ګیله‌من وزیر، ذکیم وزیر، عیدرحمن وزیر او نورو سره «ظلم او وحشت» کېږي او د نړۍوالو جرمونو محکمه باید په دې اړه څېړنه او پوښتنه وکړي.