د پاکستان کراچۍ کې د ابوبکر اسلاميه مدرسې مشر وژل شوی

کابل (پژواک، ۲۲ وږی ۱۴۰۲): پاکستاني پوليس وايي، د سیند صوبې اړوند کراچۍ کې یو دیني عالم او د جامعه ابوبکر اسلاميه مدرسې مشر شیخ ضیاءالرحمان مدني په يو وسله‌وال بريد کې وژل شوی دی.

د امریکا غږ د راپور له مخې، د کراچۍ پولیسو یوه سیمه‌ییز مشر ظفر چهانګا رسنیو ته ویلي چې مولانا ضیاءالرحمان مدني تېره ورځ د کراچۍ په ګلستان جوهر سیمه کې وسله‌والو موټرسایکل‌سپرو وژلی دی.

هغه زیاتوي، دا پېښه ظاهراً يو هدفي بريد ښکاري او هغه مهال شوی چې شيخ مدني په ياده سيمه کې قدم واهه.

د ظفر چهانګا په وینا، مدني د اهل‌ حدیث علماوو له ډلې وو چې د پاکستان ټولو مذهبي حلقو کې يې ځانګړی رسوخ درلود.

په راپور کې راغلي چې د اهل‌ حدیثو د مرکزي جمعیت کراچۍ څانګې مشر مولانا افضل سردار پر ياده پېښه خواشيني ښودلې او له پاکستاني چارواکو يې غوښتي چې په دې اړه پلټنې وکړي او د برید عاملین  د قانون منګولو ته وسپاري.

د دغه برید مسوولیت تر اوسه چا پر غاړه نه دی اخيستی.