بامیان (پژواک، ۳۱ وږی ۱۴۰۲): بامیان کې ځايي مسوولین وايي، هغه ماشوم یې بېرته خپلې کورنۍ ته سپارلی چې نهه ورځې مخکې په دغه ولایت کې د ۳۰ زره افغانیو په بدل کې یوې بلې کورنۍ ته ورکړل شوی و.
د باميان د مرکز اړوند د «پتاب لغمان» سيمې اوسېدونکى احمدشاه پرون پژواک ته ویلي وو، بېوزلي او ناچاري د دې لامل شوه چې خپل درې مياشتنى زوى په ٣٥ زره افغانيو وپلوري څو د خپلې کورنۍ د نورو غړو ژوند وژغوري.
هغه په داسې حال کې چې ویل یې، د ماشوم بېلوالی یې نه شي زغملی، غوښتنه وکړه چې ماشوم دې یې بېرته ورته وسپارل شي.
د بامیان د والي ویاند صبور فرزان سیغاني نن پژواک ته وویل چې د دغه ولایت والي مولوي عبدالله سرحدي، د دغه خبر له خپرېدو وروسته مسوولینو ته سپارښتنه وکړه څو موضوع وڅېړي او ستونزې ته رسېدنه وکړي.
هغه زياته کړه چې ياد ماشوم پرون مازدیګر (د وږي ٣٠مه) د باميان د والي له لوري خپلې کورنۍ ته وسپارل شو.
فرزان وايي، د احمدشاه او د هغه کورنۍ اقتصادي وضعیت یو شان دي چې د نارینه اولاد نه درلودو له امله یې احمدشاه د ۳۵زره افغانیو په بدل کې اخیستی و.
دغه راز هغه زياته کړه چې د دواړو لورو له رضایت وروسته د باميان والي دغه ماشوم بېرته خپلې مور ته وسپاره او له دواړو کورنيو سره يې مالي مرسته وکړه.
اوس د دغه ماشوم کورنۍ وايي، خوښ دي چې ماشوم يې بېرته ورته وسپارل شو؛ ځکه چې د هغه جلاوالی د دوی لپاره د زغم وړ نه و.
غړيYou need to subscribe to view the full article. Please login or register a new account.
